قصيدة * ربي يا مولاي * للشاعر يزيد علوي اسماعيلي

★ربي يا مولايا★

نبدا باسم الله رازقي خــــالقي و َمولايا ★

. الكريم المنـــان من خلق الكون و لَنعام

اكرم بجودك كل مخلوق يحتاج رعـــــــايا ★

. نتا جوّاد يـــا رحيم يــــا كَريم الكرام

ارحمني يا رحمٰن و اغفر لي يـا رب خطايا ★

. و رعــاني كما رعيتني علقة في الارحام

لا رب سواك يــــــا المولى يسمع شكايا ★

. اما العباد مـــــــــا تراعي ما ترد سلام

كن ف جنبي و في مساري و رضاك معايا ★

. راني خـــــاطي و دون عفوك راني نتلام

طـــــــالب سترك ، اغفر ذنبي حقق منايا★

. و بليني بالصوم و الصلا ، و نوافل و قيام

رافع كفوفي يــــــــا السَّميع اسمع رجايا★

يشفى المريض و ما تعود ف ذاتو لسقام

نجِّي العبــــــــاد من وباء جايب لبلايا ★

. كيتنقل بين بلدان عرب و عجـــــــام

لا مُنجِي سواك يا العليم عـالم الخفـــــايا★

. هـٰــذا داء و داع حارو ف علاجو لَفهام

كثرة فيه قوال و كل قــــايل يقول حكايا ★

. ما بين الباحث و فقيه و هاوي تنجـــــام

و تحلّت لفمام بين جــــاهل و عديم دراية ★

. و ضعنا من تخمام كيف ضــــاعت بنا ليّام

هذا قوالو زور ذاك خــاطي من دون نوايا★

.و الحقيقة تلفت كيف تلفو اليوما لَـــعوام

المســــاجد سدت و وقفت الخدمة و قرايا ★

. مؤدن فالصمعة و مــا فجامع غير الإمـام

يـــــا لطيف ارحم ، ابعث جندك يجينا آية ★

. كورونا ترحل و مــــا تعود غَ قصة و كلام

و نختم باسم الله رازقي خـالقي و َمولايا ★

. الكريم المنــــــان من خلق الكون و لَنعام

اكرم بجودك كل مخلوق يحتاج رعـــــــايا ★

. لا جوّاد سْواك يـا رحيم يـــــا كَريم الكرام

★ يزيد علوي اسماعيلي ★