شلا سوايع فاتت و هربات من لعمر
علاش عليك عل لماضي يا عيني بكاية
نسا لي فات يا قلبي صبر و زيد صبر
نوصيك و نزيد نوصيك تسلح بلوعاية
على الشباب لي ضاع يا راسي لا تتحسر
حمد ربي الكريم العالي زين لعطايا
واخا جنانك كرم ما عطى لا غلة لا ثمر
و صباع الناس تنعت فيك و فامها دواية
خليهم يا راسي لي بغى يتكلم و يهضر
نوصيك ديما تهلا فالنخوة و لعناية
قاسيتي هم الزمان و لهلا يزيد كثر
لا تديهاش يا رويسي في هضرت لحضاية
قد ما طال هرس الوقت لا بد يجبر
ما تهمك هضرة ما تديها في وشاية
الدنيا ايامها تفوت ما يدوم غير لقبر
دير بحساب الموت هادي نخليها ليك وصاية
قد ما خضار الجنان لا بد يذبال و يولي صفر
تعلم حكام الوقت يا راسي لا تولي ضحكة و شفاية
بقلمي : مجدوب الرمى
Le 25/04/2020
تعليقات
إرسال تعليق