★الحاكي ١
قصة حمو شكا بهمو * لالة هدى مهبلاه
كيف الناگة صايگاه
حمو بظرافتو معاها * و هدى تعطيه ب الگْفا
حمو قروي قليل يدوي * رابط لسانو ف فاه
بالكاد تسمع لو لغاه
و لالة هدى بنت المدون * ديما لْريّو مخالفة
حمو مربوط في هواها * لكن هِي ما معبراه
قدام الناس حگراه
كيّة گلبو اللي بغاها * يمشي متلوف ب حفا
من يوم ما جابها لدارو * و هي المحنة تابعاه
غادي و الضحكة وراه
قدام هلو و كذاك جارو * نهار و ليلة مطايفة
ديما غانس عليه قبو * و مغطي راسو جواه
مفتون و زينها عماه
ديما مطوي على جنابو * و يماه عليه خايفة
★الأم
انا هنية ام حمو * و بين يديا مربياه
و حليب صدري مرضعاه
هو ديما قريب ليا * جات هدى له خاطفة
لقاتو مسكين غير نية * بيرو لا زال لو غطاه
رمات سطلها مصيداه
وحبال دلوها عصية * ف طراف البير واقفة
هدى عقرب سمماتو * و حتى ترياق ما شفاه
ولا شي راقي رقاه
خايفة من سمها يقتلو * و الكبدة عليه راجفة
ولدي حمو ما يهمو * كلامي انا ولا باه
عيينا نتحاورو معاه
حاسب كلامنا تفاهة * يرد بنظرات ناشفة
ما يتكلم ما يناقش * و بكلمة ما يفوه فاه
صبح ك بكمة مسكتاه
حاولت كثير يا سيادي * و نرجى ربي يلا عفا
★ ام هدى
بنتي هدى كيف وردة * و الزين هي لالاه
زينها من شافو غواه
بنت الاصل يا سيادي * و سخية في مضايفة
تلبس عصري على الموضة*و السوم ما همها غلاه
ياك باباها اللي شراه
أخر العنقود في ولادي *و العزيز لا لو مناصفة
و حمو من قرية بعيدة * جا رامي علينا بلاه
و ما كنت أنا رضياه
لكن لْبُو كان راضي * وْ نا من حمو گانفة
قال يملك ڤيلا جديدة * و شلا اراضي حداه
هدى تنعم بالجاه
نسمع و نايا شريدة * لا حس لا عين شايفة
بعد سبع ايام مشيت عندو * بصفة حماه زايراه
و طريق طويل قاطعاه
ما لقيت فْرَمْ لا بهايم* كاذب ب قوال ما وفى
★حمو
نهوى هدى و كيف يهدى * قلبي و هي مّحناه
زينها قلبي اللي بغاه
ديما نسعى في رضاها * و نتعامل بملاطفة
هدى زينة تزين زينة * و لضرّي هي دواه
عطيتها قلبي و ما معاه
هي تربات في مدينة * و بالحضارة موالفة
ما كاين زين كيف هدى*لا فهاد الجيل لا وراه
فريدة و ما لِها شباه
لما ننظر في بهاها * فراصي توقف واقفة
و ناس قبابل حاسداني * يقولو هدى ساحراه
و كلها يهجو بهجاه
شي بعضين قالو عليا * خاد هزيلة و شارفة
بكيد الحاسد ما نبالي * نرمي لغطو مع لغاه
آش شرك بّا مع بّاه
انا لهم ما مسالي * و وذني لهم عايفة
★هدى
راجلي حمو تابع امو * لالة هنيّة حايشاه
ديما عليا محرشاه
ماقدرت انا على بلاها * و ديما للشر هادفة
هي و لوايسي يذمو * من صباحي يلى مساه
هاذشي ما مسانساه
ف الحگرة عايشة معاها * من نگير انا خايفة
كل ما يدخل نريد نشكي * نلقاها داخلة وراه
بكثرة قوال شاداه
و ما نقدر نحكي حداها * ف شكاها محتارفة
لها غي ناب و تآمر * و يا ويل يلا تقول آه
ينوض الراگد من ثراه
و يلا من دا نتا تعاني * فلييّو و تزيدو دفا
آجي تحلب دوز تحطب * شوفي لغنم في خلاه
هادشي بزاف واه
طحت معهم في مصيدة*صغيرة ما كنت عارفة
★حمو
لالة هدى يا وريدة * غرامك لقلبي عماه
بلى بالي لما بلاه
ما بقات تحلا لو نزاهة * هموم عليا مصافّة
★هدى
كلامك حمو تزاد همو * و أنايا ما حاملاه
و ما نطيق ودن سامعاه
مليت انا من فعالك * و حتى لظلك عايفة
★حمو
يهديك الله يا كبيدة * راه جرحك انا دواه
القلب يحبك عارفاه
علاش عليك بالنكايد * قولي قولة ملاطفة
★هدى
لسانك لمّو حلو و سمّو * ملِّيتو ما رايداه
و إسم هدى غي نساه
و العقد اللي كان شارك * نعطيه بلا مخاطفة
★حمو
بالله عليك يا بنية * رفقي بقليب حارقاه
لسانك بجمر طالقاه
قلبي مكوي ب غدايد * هدى و علاش زاعفة
★هدى
القلب المفروق غير طمّو * انا شدخلني جواه
راه ما نحبو ما نراه
عفاك عطيني براتي * بسلام و بمساعفة
★ حمو
يا هدى حنّي عليّا * لا تقطعي لقلبي رجاه
عقلي و نتي ساكناه
بدني دونك غير زايد * و عيون عليك دارفة
★ هدى
عفاك سد فمك زمّو * يكفي تحريك الشفاه
كذبك انا موالفاه
عمّر العين في الصحاري* ما تلقى ماها صفا
★ حمو
ديما ساكت ما نعاند * و نتي للعيب بادياه
شر المعيور في فواه
و اليوم غا تشوفي عيوبي*و جوابي بمرادفة
غادي نحكي للقايد * و نرضى حكمو يلا ملاه
كان لي آمر او ناه
هو من لو مراس ف نزاع*و الحكم يلا قضا وفى
★ هدى
سير أحمو و دير جهدك * و اللي ما قاد لو سعاه
أنتا و الخيبة شباه
غادي نمشي ندير دعوة *و عنوان الدار عارفة
نشكي للقاضي بضري * نحكي امري و ما طواه
نبوح بسري و ما خفاه
نطالب بحقوقي و لازم * ناخد حقي مضاعفة
★ الحاكي ٢
رينا هدى تجر حمو * لعند القاضي داعياه
بسوء العشرة تاهماه
و هو كعبي ما يسايس *و مصايب له جارفة
من كار لكار غير تالف * و المحكمة ما حداه
و هدى ما هي عاذراه
ما بقى لو وقت كيف يعمل * و الحركة واقفة
ما كان يظن الطلاق واعر * ولا في بالو نواه
قطيّط هذا ما شواه
كان يظنو جراء ساهل * جات افكارو مخالفة
كل ما يجمع شي دراهم * تجي دعوة تابعاه
يركب ياخدها معاه
و بعد العودة يجي يسلف*و القهرة فيه جايفة
القاضي يحكم ببراهن * و بداكشي اللي قراه
و حمو شي ما دراه
هدى حاكت لو قضية * و شهود جابت طايفة
★القاضي
زيدي هدى آش هذا * شفتك نتي دعيــاه
كلشي ف وراق راوياه
قسمي بالله ما تكذبي * و رفعي يمناك حالفة
★هدى
هاذي يدي يا القاضي * بكلام الحق رافعاه
نحلف بجاه الله
كل كلمة في مقالي* صحيحة ما هي زايفة
★ حمو
راها تكذب يا القاضي * و كلام الحق حاجباه
هي الكذوب هاوياه
و لو تعطيها بحورة * ترجع تقول ناشفة
★ القاضي
قرّب عندي لاش تدوي ؟* و لما نسألك قل آه
فالحين اسكت و انْتْباه
راني نبحث في حقايق * البادي فيها و ما خفا
هدى عندي في وثايق *
١- صداقك كلو عطاه
٢- قبلتي تسكني ما بّاه
٣- يخدم و تقابلي الخيمة *
٤- و اللي نتجتو مناصفة
★هدى
كنت صغيرة و غير نية * يكذب وانا متيّقاه
و مشيت مغامرة معاه
يسرح ف شياه و بهايم * وانا فالحوش واقفة
ما يكسيني و ما يسبط * ديما دربال لابساه
و هو مجلي في خلاه
العيد الناس في مواسم * وانا لدموع دارفة
★القاضي
قرّب حمو دوي نفهمو * مالك فاهي و بال ساه ؟
واش صحيح ما حاكياه ؟
هي تحكي و بك تشكي * و باين منك زاعفة
★حمو
كلامها فاضي يا القاضي * هذا قالب حايكاه
و كل ما درتو ناسياه
الصدق وراها رماتو * و كلام الكذب عازفاه
من نهار خديتها لداري * و هي لظهري راكباه
ما تفرقني على شياه
وانا صابر يا القاضي * و القبيلة گاع شايفة
و دابا راضي يا القاضي * تاخد اللي باغياه
راضي بقضاء الله
و اللي سلباتو ف دنيا * غدا ناخدو ب وفى
★ الحاكي
طالت لحكام في محاكم * و ديما هدى مقاضياه
قدام قضا(ة) مجرجراه
و حمو مجرور غير تابع * جرحو دامي و ما شفا
خايف تالف ما موالف * و هدى بالكيد رادفاه
و صوتو ناشف في شفاه
ما عاد يفيدو كلامو * لا حين يگر و لا نفى
و القصة باقية طويلة * لكن الحاكي نهاه
يزيد علوي رواه
جابو عبرة على زواج * يفيد الناس كافة
الزواج نعمة و رحمة * و هو تيسير من الله
نرجاو الخير من وراه
و هدى و حمو غير قصة ، و الزمان عليها عفا
تمت بحمد الله في 27 ابريل 2020
تعليقات
إرسال تعليق