قلت نتفكر ايام الصغر
بنيت ساس الرمل ف بحر
طااااااح .والريح كانت هدامة
شفت الموجة تضرب ف الصخر
والصبر امتلوه الناس للحجر
كل يوم يغرق واحد ف الدوامة
انا شفت موجة بماها ترسم
وردة منحوتة ع جبال وتردم
قلت هادي موجة رسامة
مال لبحر زعفان خرج لكشكوشة
عيا مايبلع ناس مايقبل الموتى
يرميهم ع البر يااااارب السلامة
مال السفينة حتى توصل المينا
عاد ترسى ف المرسى
تشهد عليها طيور الحوامة
كيف الولد الصغير ف كرش امو
عايش ف الامان وعايش ف منامة
نهار خرج للدنيا عاش بطولة ايام
لعب فيها ادوار الضحك والدراما
مال الشمس تغطس ف بحر
تطفى فيه ترجع الدنيا مظلامة
مال الصياد مايخاف لمواج
ما يأمن غدر لبحر غير لخطاتو لفهامة
.ونا نتفكر ف بحر الدنيا...
فيه قروش ...كبرو لكروش
قلوبهم رجعات قاصحة كيف رخامة
بحرهم هايج يخرج منو هيشات
الى نجا منهم ايكون خلص ف غرامة
طاح همهم ..حارت عليهم العيشات
ناس گالسة عطلانة وناس خدامة
شفت شحال من واحد ركب الموجة
هادي لحسانة ...وهادي موضة لباس
جيل ضاااع حتى بانت فيه العلامة
وبحر لمرا بحر غارق
امواجو تدي وتجيب
اخافوه .....العوامة
وبابها تعرف شكون الطارق
من غيرو داك لحبيب
يزعم عليها ف الزعامة
يااااك هي غير مرا
يقبل هو ولا يكون رافض
ايكون حلو ..ولا حامض
ايكون دفلة ...ولا كاع خزامة
بحر لمرا حارو فيه العلما
بقلم حسناء العجوري
تعليقات
إرسال تعليق