هول صدمة.....
من هول صدمة خلات لعقل تالف
بكات عيني و بقى لخاطر مجروح
بقيت هايم فطريقي فين نمشي ما عارف
السر مكتوم فقلبي لحزن فوجهي مفضوح
صبري ولا قليل و الزهر مع حالي تخالف
الفرح في جناني ذبال الضحك ما بقى مسموح
من غدر ليام وليت يا حبابي مخلوع خايف
عشت الغربة فداري حسبوني ناسي مريوح
سواد الليل بنهار في عينيا وليت شايف
كاتم شلا سرار في قلبي ما قديت نبوح
باش نسكت يا ناس السكات ما موالف
لكسدة مذبالة عيانة و جات الدقة فالروح
آه و آه منك يا زمان التفاتف و التخارف
المسكين من ضرك ما بقى صاب فين يروح
علاش يا ناس كلشي ولا غادي بي لمعارف
جاوبوني يا حبابي على هاد السؤال المطروح ؟
علاش قليل الجهد وسط ناسو ما بقاش عارف
علاش لحكرة يا ناس بلاش تزيدو فقلبو لجروح
بقلمي : مجدوب الرمى
Le 28/04/2020
تعليقات
إرسال تعليق