سجال حول قصيدة السمرة للشاعر يزيد العلوي الاسماعيلي ( التازي رضوان ربيعة الزيات - الشيخ محمد المرعازي

مجاراتي لسي Yazid Alaoui Ismaili في قصيدته ^السمرة^ :

======================================

يزيد العلوي الإسماعلي :

ما بقى شي يتگال يا السمرة الحروف ذبالو

و ألحاني تلفت زاد كمّلها لســــــان ثقال

القليَّب مسكين راه ذايب رفقي من حـــــالو

و العقيّل مشى يـــا السمرة قاسو لهبال

قولي لي بالله يـــا السمرة ش ْتراك تسالو

لا كبدة هزّت لا نظرتي من ذاك الحـال ؟

شفت جفاك عصى ما شفقتي ما شفتي مالو

واش ذا كلّو جهل اولا موضة من لـَـدلال

راه الطير الحر يا غزالة ما يهز رحــــــــالو

مــــــَا يترك عشّو ما يغرّو زيغ التجوال

كيف الدلو د البير يـا حبيبة يهجر طوالو ؟؟

راه يبقى عطشان لو غــابت عنّـو لَحبال!!

مهما طال جفاك يا الگمرة حنا عليك نســـالو

و الگلب المحروق راه باقي ينبض مـازال

هذا عار عليك يا السمرة سمعي لســــــؤالو

لا تزيدي همو راه خــــــاف يكثرو لعلال

حضني هاذ عشيق يا حنينة و سكني ف ظلالو

و اسقيه غرامك لا تخلي روضو يذبــــــال

كوني ليه طبيب يــــــا نجيمة جراحو يقلالو

و تطل الفرحة ضـــــاوية ك بسمة لَهلال

يلا تديري معروف يا الشهدة و تشوفي مالو

و كوني نحلة يا حبيبة جبحو يعســـــــال

لُو يطفى جَمْــرو يــــا وريدة و تبرد هوالو

ينسى لَهموم و ما يعود حامل ف ثقـَــال

هـــذا نِدا لك يا قميحة اسمعي مــــــوَّالو

زرعتو بدرة يلا سقيتيه ينوض سبــــــال

يعم الخير في ريـــــــــاضو و تكثر غلالو

و من ذيك البذرة را نحصدو درة و كبال

لا التيقي بمن قال راجل قيمتو في مــالو

و شحال من راجل معه مالو ما يسوى ريال

الرجل لَقحيح يــــا لبيبة قياسو ب افعالو

ذاك من قلبو كنز و عقلو هو راسمـال

ما يتبع قمار ما يراهن بالو ف عيــــــالو

و ما يصرف عن بيت إلا من جهدو لَحلال

راه الناس اجناس و اهل الجد اليوم قلالو

يلا ردْتي تعزل راه خاصك لهم غربـــال

دَنْدَنْتْ كلامي دون ما نشوف قياس مثالو

غَرْبَلْت كلامي و عْزَلت الحب من نخــّال

هذا قول غرام من (يزيد) صاغو بخيـــالو

و من عجبو الكلام يعلّق ب زين او غزال

======================================

التازي رضوان:

قريت كلامك قلت فنفسي محلا تغزالو

لكن فالغرام سولني نخبرك فالحال

دويتي عل سمرة زينها ماشفت بحالو

تجمع فزين البنات وما يوزنو منو متقال

حب السمرة في قلبي عشعش لي فدخالو

غناني عن الكنوز وانا ما نبدلو بالمال

الناس يظلموني ويقولو هادي ساحرة لو

بزاف على السحر واقلا هادشي توكال

كان الله فالعون كل واحد عقلو مشى لو

من حر الغرام يفكر فغزالو ليلو ؤماطال

شحال من مغروم من ظلم الحساد فقد غزالو

واللي نجاو منو نعدهم ليك ناس قلال

عين الحساد صابت جسمي زادت فهزالو

تقول لي تقاسي ك نقاسي نقول لك موحال.

دعيتهم الله كل واحد يقول للي يحلا لو

ومادام قلبي يخفق ودgانو يهدو الجبال

نفكر سي ليزيد فشي كلام مشى من بالو

جمعنا هادي مدة فسطور أحلى سجال

======================================

يزيد العلوي الإسماعلي:

جاني من تازة كيجادل فاسي ف قوالو *

و الفاسي سافر و ساقو طابو بالترحال

قطع شلا بلدان و السمرة ديما في بالو *

ما سْها بين جبال ما نسى ف ثلوج او رمال

سمرتي انا ريم ما شافَت لَغْواب مثالو *

سالف كيف حرير على كثاف نازل شلال

خدودها كِ غنباج نشوفهم عضايا يجفالو *

و لَهْدَب كيف ظلام بلا كحل تراه ُيكحال

ثغرها مرسوم كيف ليل مقوّس هلالو *

و البسمة زينة و حتى الريق لو طعم زلال

هذا غزل مغزول على غزالي بمغازل زالو *

و كل من جادلني على غزالي يشدو زلزال

راني نغير عليه و في المغيار اسمع شْ قالو : *

( من صادف مغيـــــار لا يكثر معه جدال )

زين الزّوِينة زين مــــا كاينشي زين بحالو *

و من يفقد زينو راه يبكي لُو عــــــاللطلال

و نختم بكلام و التازي نشفق من حــــــالو *

ف قْبال غرامي غرامو مـــــــا ساوي مثقال

======================================

التازي رضوان:

أجي نعاود ليك عل زين السمرة وكيف جمالو

لكن نخاف عليك من وصفها يشدك الهبال

غي لونها بعدا كيف الشكلاط يذوب بشكالو

عليها حجاب الله ويحفظ هاد القد العال

وجهها بالنور كيف البدر ليلة كمالو

ويلا غاب فسماه ماينوب عليه ضي الهلال

تضوي كيف الشمس ساعة الظهر عند زوالو

طيبها فاح فالمكان غير نشمو يسعد لي الفال

الحاجب فوق العين قوس والرموش هي نبالو

رماتني بيهوم كيف عسكر هجمو وسط لقتال

جبينها تاج مرصع بالذهب هكذا ديما حالو

والمعطس محطوط قياس فوق منو الخال

الشعر مجدول حرير لو تشوفو عند تسبالو

يعمي بلابصار حين يسيح يمين و شمال

زين غزالي باين ونعرفو أنا غير من خيالو

الله لا يحرمني منو ولا يتقطع بيناتنا وصال

لا تلوم يامن لا حب ومايدري مايجرى لو

لو يصيبو سهم الحب واقف وسط الرجال

======================================

يزيد العلوي الإسماعلي:

سلب عقلي لسمر واش نعمل العيون حوالو *

ما ننظر غيرو ما نخاطب حد ف جوّال

سعيد فكاكة ما فاهم ( يزيد ) ش جرى لو *

سال السي رضوان راه فاهمني و على بال

هيام الريم صعيب ما يفهمو الا من جالو *

و نتا يا سعيد راك مربوط وسط المحال

راه لسمر فتان و خوك مفتون شفق من حالو *

صار سليب القلب و لذاك السمرة قلبو مال

لا تتكي عالجرح راه طايب لا تسيل دمالو *

قلبي حامل حب ما تقوى حملو لَجبال

ما نقبل من يذكر السمرة و لو ف مقالو *

راني نغير حتى على من يقرب من الخيال

حبي حُب حبوب و بالحبة معزول مكالو *

ماشي كيف الغير مطحون طحين النخال

حبي حب ثقيل غير قلبي وحدو من شالو *

ما يحملوه نسور و لو بجنحين طوار

ربي من يعلم آش حامل قلبي ف دخالو *

ديما في بالي في نهاري و ليل و ما طال

لها خصر نحيل حين يرقص يزيد دلالو *

و صدر جوج هضاب ما تركبو خصك شحال

لو يريد الزين نبيع روحي أو نهديها لو *

و نعطيها قلبي في خراص تحطو خلخال

======================================

التازي رضوان:

وصفي للزين لسمر ماقدرت نختم كمالو

يكفي فوصف لغزال زينها يتضرب به لمثال

قالو البنات كثار لاش السمرة ديما في بالو

لو تغيب عليه بحال إلى وفى ليه الميجال

عمرهوم ذاقو الغرام ؤ مايفهمو فيه والو

ياسيدي راضي بالمكتاب كيف راد نعم المتعال

يسولوني عن سباب وكل واحد ؤتسوالو

وانا داري بهمهوم على قلوبهم زاد ثقال

يحسدوك عالغرام وعلى عمرك لو وفى ميجالو

ويحسدوك على سقمك ويحسدوك فكل لحوال.

يا سيادي طالب الهنا مابقيت باغي والو

غير السمرة ترضى وتجود عليا بالوصال

======================================

يزيد علوي اسماعيلي:

يا زينة لريام يا السمرة يــا بدر ب كمالو *

يا نجمة ف سما يا قمر يا غرة لهلال

كيف يدير غريم في ظـلام و لا ضي حوالو *

لا شمعة باين نورها لا قنديل شعال

قنديلي زيتو مـــــــا روى و لا مس فتالو *

و الكمرة ف سماي عالية تبعدني بْميال

حاير و مضيوم يا السمرة و الهموم عضالو *

خايف من لَبعاد يهلكني قبل الآجال

لو في صدري باب يصِل قلبي نبادر بزوالو *

ما نتركو عندي و لو لحظة هذا محال

قلبي كان سبع قبل السمرة داير باشبالو *

كان قوي و صحيح و بكل ثقة يجابه لفيال

و اليوم صار غشا كيف خنشة حامل زبالو *

إيلا تحط ف غاب بِوْقاحة تركلو لَبغال

هذا حال الحب يا سيادي و هاذي افعالو *

و يا ويلو من حب محبوب و من دون آمال

غرام السمرة يقتل و اللي قاومها تغتالو *

كلمة ( علوي) قالها نقلوه للأجيال

======================================

التازي رضوان:

أنا مانملك غير قلبي والغرام راسمالو

لو يجافيني لسمر ضاع مني راسلمال

كيف نعيش أنا لو قلبي زادت فنكالو

مابقى فالعيش لذة بغياب مولت الخال

سمعتي بقصة قيس فغرامو أش جرالو

لكن قصتي فالحب بعيدة عليه بأميال

وعنتر ؤعبلة ومافعلوه عمامو وخوالو

من كثرة همو يوم على يوم يزيد يكحال

و أبو نواس قبل مايتوب غرق فضلالو

دارها به الهوى مايفرق الحرام من الحلال

هذا هو الغرام يكبل الناس ديما فحبالو

ما يتفك منو لواحد غير إلى معاه هبال

اصبر يا المغروم بالصبر لصعاب يسهالو

ربي بيديه القلوب قادر يريح لك البال

طالب ربي فالختم يثبتني عند سؤالو

ونفوز يوم البعث بشفاعة خاتم لرسال

======================================

يزيد علوي اسماعيلي:

الغريم الهاوي علاش ناوي ، رافع مشعالو *

جاي جامع طاوي مع تلاوي بخطى يختال

ما يدخل لغرام غير فارس صنديد ف قتالو *

وانا عاشق لقتال و نحارب من دون نبال

من غيرتي نفضح كل كذبو ، نزيد ف تبطالو *

و نخلّيه صريع وسط حلبة سيفو عطّال

ما نترك نداد و من جــــا ند نسارع بزوالو *

سوق السمرة برج ، ما يبرّح فيه الدلاّل

ما تنفعو حيلة مع السمرة و ما تفيد حيالو *

السمرة ما تقبل من بان ف قولو محتال

من كلمة نرديه يروح هارب عاثر ف سمالو *

و تعود السمرة معنقاني عناق الابطال

عناقي للسمرة ما يفهمو ما يعي بفضالو *

و من وصلو لحني وريد قلبو يبقى شغّال

صدرها على صدري و قلبها نابض بين تلالو *

و كل دقة من قلب في صدرها صوتو مرسال

قلبي سمع لغاه و صار ينبض على منوالو *

دقة على دقة صارت نغمة ، خرجت موّال

======================================

التازي رضوان:

طير ياطير ؤعللي سبق ليزيد لا تصغا لو

طير عند السمرة وصل ليها مني المرسال

من التازي رضوان قل ليها تنظر من حالو

بين عشية وصباح صار حالو مايشبه حال

قول ليها تعطف لو تجود عليه بوصالو

ولفك بعد العشرة ولا تجازيه بهاد تنخال

ماوصلك اشعارو فيك ما سمعتي بقوالو

كل يوم يتغنى فيك وينشد شلا موال

ماخلا في وصفك صورتك شايفها قبالو

لوكان بجهدو يصنع من زينك ألف تمثال

لا تخبر يا طير ليزيد ولا تجواب تسوالو

سمح فيه ؤطير بلغ جوابي بلا تعطال

خايف يقرا ردها ويزيد هبال فوق هبالو

ونكون أنايا لسبب بعدما كان سيد العقال

======================================

يزيد العلوي اسماعيلي

جاني برباب كيدندن ، و نغمة ف قوالو *

التازي رضوان يا سيادي شاعر زجال

ذي خمس ايام يا سيادي اليوم و بليالو *

كانت قصيدة تطورت و صارت سجال

قولو للتازي الله يجازي من زاد هبالو *

راه يتزاحم على السمرة ، و ما نحب هزال

جاني يجادلني على السمرة و زايد ف جدالو *

يريد نحيد على حبيبي ، و هذا محال

ما باغي يفهم ذا غشيم و بالغ ف جهالو *

ما رايد يروى و لا يشوف قوال العقال

يلا ما هو قاري يشوف لو شيخ هو يقرالو *

ما يبقى معمي ، يفهّمو يفتّحلو المقال = ( العيون)

ما نترك سمرة و لو كان عيونو يحوالو *

هاذي زين( الريم شدون مها عزة و غزال ) = كلها اسماء للغزال

لو يقرب لها ، بسيوفي نبتر وصالو *

و نجيه في لَوجه حيت انا ماشي غفّال

انا على السمرة ما نفاوض من نفهم والو *

فصدري قلب يحب و ف يدي سيفي جلجال

يلا ضربو ضربة يفارقو على ظلو و خيالو *

و ما يجمع بدنو ، حين يلقاه رطال رطال.

======================================

رضوان التازي:

راني كيف السبع يحكم فكل من فدغالو

بنايبو كيخلع لو ما تيقتني عني سال

حل وذنيك واسمع لون لسمر راه قلالو

من حبها مانشبع ماسخيت بها مازال

عيني بحر تدمع من جور اليزيد ؤقوالو

واخا راني سبع يناديني عباس ؤعلال

سلاحك ما ينفع مصدي ماماضي والو

خود كلام تجرع من سمي حتى يصبح لحال

هادشي غير الربع مازال ماشفتي والو

تبات تسجد وتركع تزاوg نعم المتعال

لو لمراعزي يشفع مرحبا بشفاعتو وقوالو

نخلي ليك المدفع قتلني به بلا تعطال

======================================

اليزيد العلوي اسماعلي:

غرام السمرة شلال و كل غريم يعزل جدوالو *

و من لا لو جدوَل من غدَا زهرو يذبال

سمرتي انا في غاب ، و نْتَا ما تدخل دغالو *

ما يصطاد العنود سوى من قارص عــاللنبال

انا عودي مقدام و صعيب عليك ف تنزالو *

و عودك ما يزعم غير يشوف عودي يجفال

يا مَن هو يصغي ، لي قدر محزّم قفّــالو *

و من لا لو قفّــال ما فقدرو ، تراهُ يبسال

للسمرة نهدي قصر دهبي بابو ب قفالو *

ما يوصلو حرّاز حيت عاصي فالبرج العال

نهديها قمصان و كل قميص معاهُ صندالو *

و ما ننسى قفطان من فاس بجنبو تخمال

كل هدية ف طبق و كل طبق معاهُ طبّالو *

و سابق بالوترة و بندير قشبال و زروال

و نعرض المغرب ببحورو صحرا و جبالو *

و تبارك الحضور ل( علوي) من تافيلال

======================================

تدخلت السيدة ربيعة الزيات فقالت:

كلها قال قوال وكل واحد متشبث بقوالو

وانا حرت فقولي ما تركتو لي ما يتقال

ما عرفتو حالة مريض دايخ ريو و احوالو

نطلبو الكريم يلطف و يزيان الحال

اليوم تفتح سعدي كيف لبدر ليلة كمالو

و زيان الخاطر جيت نكابر نقاد المورال

سجال السمرة قالت لمرا ماريت بحالو

جميلة لمكلس صديقة واخت الرجال

هاذي معلقة قال بلحاج و اكد قوالو

وقولو معقول و المزاح توجدو ، محال

شيخنا لعزيز جا يبارك القياس وفصالو

سيدي مرعازي ملحوني كبير على بال

خويا فكاكة دخل حرفو زاعم فمقالو

بكل شجاعة شمر و دخل النزال

خويا رضوان كنحييه ها بوجور ديالو

زعيم نعرفو و زين حرفو عليه التعوال

أما يزيد قلم فريد قليل بحالو

حرف ما ينضب ما يسالي مدادو مازال

اختي حسنية ها السجال بزينو وكمالو

دخلي السربة و كتبي لنا شي موال

لمّتكم مشموم مشكل يفرح جمالو

زين بنظرة يسعد و يشفي لعلال

ذا مجمع الخير والسعادة يا من تسالو

كان سبابو على السمرة دار الجدال

======================================

وختم سيدي Mohammed Meraazi السجال بهذة الخاتمة الرائعة فقال:

سجال ماريت امثيلو اليوم ببيات طوالو

بين جوج اقلام فريدة حروها فالشعر ثقال

بين يريد العلوي من بدا نظم قوالو

وجوبو رضوان التازي وبينهم بدا لجدال

على السمرة قامو لگحار شكون يظفر بغزالو

وطالت المعركة ما بينهم وطوال السجال

وبقيت انا نتفرج بينهم كلها ومقالو

حينها جات اللي حداتهم وتسالا لجدال

بقول صادق ومحبة بينهم صلحت ما قالو

ربيعة الزيات أربنا حفظها يا متعال

ألف تحية ليكم من قلبي ودخالو

ونتمنى ليكم التوفيق في ثاني سجال .