احلام الربيع ...
مال زهور احلامنا ذبلات
فعز ربيعها بالدموع بكات
شكات ضرها
ولا من يداوي
مناجل الحگرة ل سبولها حصدات
بصفايح التغمال لأمالها درسات
الريح داها
و حبها خاوي
كبة الطمع على غلتها تجمعات
نياب تنتش من لحمها هبرات
التخمال خلاها
و رد جيبها زاوي
على عينيك يا بن عدي تسرقات
ف عز النهار تخطفات
و شكون داها
غير هادوك الرعاوي
ف گدور لكذوب بلا قفال طبخات
و بكفوف اللهطة تلحسات
ينفخو ف الكير حماها
بسفود ليها كاوي
و حنا نعامة ل راسها ردمات
ف تراب الذل و سكنات
لا حد اسمع صداها
غير حيوط لقهاوي
ضفادع ف الحگرة سبحات
بنقيق الخوف تغطات
لا من الصمت شفاها
حرمل و لا جاوي
يمتى نفيقو من الݣلبات
و نطلبو بحقوق مشات
نتݣوها من داها
بكفوف عزاوي
ولا نبقاو كي ݣالو ف المثلات
ݣرعة و فݣوس محزمات
قطعو الحملة مشاو ف خلاها
من بعدها سكت الراوي
حسن العلوي
مراكش ( دجنبر 1998 )
تعليقات
إرسال تعليق