فِ التَّلْفَة الضَّرْبَة
يَتْشَافْ الْحَالْ
مَنْ الشُّوفْ شُوفَة
اتْݣَطَّعْ الْحَسْ
وُلَتْخَارَفْ قَابْلَة
يَتْحَدْ بَاسْ الشُّوفْ
وُالنَّظْرَة مَخْطُوفَة
مَنْ تَحْتْ الدَّفْ
وُالقُومَانْ غَافْلَة
اتْسُوگْ الْوَقْتْ
وُلَاسْوَاقْ مَعْيُوفَة
اتْجَمَّدْ لَگْلُوبْ
وُانْفِيسَة فَاشْلَة
الْحَالْ مَنْ احْوَالْ
وُ لَاوْقَاتْ مَشْيُوفَة
عَامْيَة اعْيُونْ
وُالدَّمْعَة سَايْلَة
ابْنَادَمْ فِ اصْلَاحْ
وُ الَعْقُولْ مَحْذُوفَة
تَزْنَادْ الْفَتْنَاتْ
وُلَفْتِيلَة شَاعْلَة
فِينْ اصْلَاحْ اللَّبْسَة
بِاغْزِيلْ الصُّوفَة
اتْصُونْ الْحَايْكْ
بِ لَخْيَاطَة الْشَامْلَة
تَجْمَعْ الْخَرْقَة
وُالْعُݣْدَة مَحْدُوفَة
تَسْڴَامْ فِيهَا النَّظْرَة
مَ اتَبَانْ مَايْلَة
يَتْحَقَّقْ لَمْلِيحْ بِالْعَيْنْ
وُالنَّظْرَة مَكْشُوفَة
تَتْبَتْ اكْفُوفْ الْمِيزَانْ
اقْيَاسَاتْ امْعَادْلَة
ابْلَا تَدْلِيسْ لَحْقُوقْ
اتْبَانْ الْمَعْنَى مَعْرُوفَة
اتْفَادَى بِيهَا اكْثِيرْ امْجَادْلَة
الْيَدْ فِ الْيَدْ وُالْكَلْمَة عَهْدْ
وُ الشُّورَة مَوْصُوفَة
تَعْلَا الرَّايَة بِ جَهْدْ
النَّاسْ الْعَاقْلَة
التَّبْنَي الْبَنْيَة مَ اتْهَدْ
وُتَزْرَعْ الْخَيْرْ امْحَبَّة مَأْلُوفَة
قلم و اداء : نوراليقين التومي
توضيب : الاستاذ : عبد الله الهواري
تعليقات
إرسال تعليق