---------------- معاني لكلام ----------------
يا السامع ذوق معاني لكلام
و استلغى احكامو
الݣول مني يعري ما كان
و ليك انت تفسير افهامو
زمان تبدلت فيه لقيام
و مشات شيامو
الجور و خسران الميزان
و الطمع ارخى علامو
كل واحد ينفخ ف لعدام
و يتطلى ب فحامو
يشعل من لحسد نيران
و يمشي ف ظلامو
هذا ما يفشي سلام
و لا يرد عليه سلامو
راكب النفخة حصان
و زايدها ب كمامو
و هذ يدعي لفهام
و لا كلام غير كلامو
ناسي بللي بحرو زخران
و ما يݣد على زخامو
و هذا طمعو ك لجام
طالقو بلا شكامو
يجري و يلهت ب لسان
حاضي الهمزة يرمي اسوامو
أما لاخر وجهو ب التوام
ما تدري ݣفاه من ݣدامو
يعطيك وجه دبا و ف حيان
يݣلب وجهو و ما تفاهمو
أما هذاك طبعو نمام
ياكل ف خوه بنهامو
نازل يحسك بالعيب طحان
و لا يحشم على جرامو
الكامل فيهم تلقاه ظلام
الرحمة عدام ف معجامو
ينكل بالضعيف عدوان
و يتلذذ من سقامو
هذا ماريتو ف ايام
الحشمة كانت من شيامو
الخير عندو دار و عنوان
معدن أصيل ب شهامو
يوم الناس كانت رخام
و خلاق تفيض باكرامو
تلݣاها تسعى ل حسان
تحب الخير و نعامو
ماشي ايام لعدواة قوام
بيها يبزر طعامو
يوكلها لخوه عدوان
و يغزز ف عظامو
يمتى بنادم يݣول حرام
يرجع لطريق تسݣامو
مهما طال عݣبو لكفان
هي دار دوامو
حسن العلوي
مراكش ( ماي 2020 )
تعليقات
إرسال تعليق