عاشق لهلال
🚥🚥🚥
لو نصيح صيحة ف الواد
شكون سمعني ؟!!
لصياح ايضيع يديه الريح
يمشي ويزيد .
لو نكتب و نهرق لمداد
و نبقى نكتب نركب لعناد
اتجف اقلامي ينفد الزاد
حروفي تغرق ف قاع الواد
شكون اقرأني ؟!!
شكون فرحني بنهار اجديد.
لو نتمنى نهزم يأسي
او نتفاءل عسى انسي
امغفل بليد
ويديروني احمق ف راسي لهبال
انتيق انصدق تابع لخيال
كيف لي نعشق ونطمع ف اهلال
ابعيد ابعيد اصعيب ومحال
و نبات عساس لمرار ف كاس
عليه نصبح عليه انمسي
يكبر يأسي نشرب نجمد
نخمد ف الحال نقطع حسي
يبقى التنهيد .
لو نطرق باب ما نصغى اجواب
وديما انا ف وجهي ديما
مسدود الباب
بقفل عاصي وبواب احديد .
لو نزرع ورد ونسقي الورد
بقطرات احلام ، مازال ف المهد
ابراعم و اكمام تدوسو لقدام
او يتحرق بعواد اوقيد
وحتى إذا أكبر يربي الشوك
الدامي لقدام
باغي نهنى و نعيش اسعيد
هذي أوهام وخطيان اصواب
شكون هناك وقرب لبعيد.
عام على عام وتكثر لعوام
و اطباق اثريد بلحم ويدام
شي احلال عليه شي عليه احرام
ما لحق ايمص حتى لعظام
حروفي مجاز ، معاني بكلام
لصحاب لعقول الناس الفهام .
ضاق يا امي الحال اهلكني الإهمال
ذاب اشبابي ورشى و اذبال
شكون يحميني من سوء الحال ؟!
يرمم لطلال
بغاوني نبقى ، منفي منسي
بحال بودنجال
ف انهار العيد !!؟؟
تعليقات
إرسال تعليق