***هذاك زمان وهذا زمان ***
* الله.. الله يابويا
عفاك حكي لي على ذاك الزمان
لي كان فيه بنادم انسان
احكي على الماضي
احكي لي بلسان اجدادي
الشاهدين على ليام
احكي لي على لي هزو سلاح ولعلام
ؤنقاو طريقنا من الشوك والضباب ولغمام
احكي لي على لي منهم دمي
وأصلي وجودي فهاذ الكيان
كنا يا ولدي ما نغرسو حتى نْزَرْبُو
وما نتصاحبو حتى نجربو
وما نضربو حتى نقربو
ما كانت ياولدي قلوبنا ساقيةلي جا يروى منها
كانت بيار ما يروى منها غير الغارق فيها
أرضنا كانت روح ماشي من والى يشگ فيها
كانت سما الكل يتمنى يحلق فيها
فزمانا كانت الناس بقلوب صافية
ديما معانا وخا تكون غايبة
ماكانت تكره وفي الحب كانت دايبة
والجورة كانت عندها حدود ما كانت سايبة
كانت بأخلاقها ديما عالية
الفوق الفوق بحال الدالية
الناس كانت كلها خير وبالمعقول غادية
حيث كانت عارفة بلي الدنيا فانية
راح ياولدي زمان بناسو
وجا جيلكم بسيوفو وفاسو
حاضي غير جنابو وراسو
حيرتيني يابويا لمن نردو اللومة
لينا احنا ولا ليكم انتوما
جيلنا يا بويا صابتو الخيبات
والكلام طويل ما تقدني فيه ساعات ولا ليلات
أخلاقنا يابويا تعفنات
وانا يابويا ماقاد نتكلم
ؤ بدواية ؤ قلم غادي نحكي ليك هذا الهم
لي شيب الروس وطلع الدم
مابقى من يسمع ما بقى من يحشم
حيث ملي دويت قالو هذا ما عارف ما عالم
راه غير هداوي سوقو خاوي خليوه داوي
اليوم يا بويا اصبح البائع غشاش، مبخرنا بحصلبان وجاوي
يبيع لينا لبطاطة بحرية والحوت سماوي
ولي ما عجبو حال كاين لي يمضي جناوي
وانا حيث غير شاري تخنقت بالتناوي
زمانا يا بويا ما عاد فيه أمان
همو هزو الطفل والطفلة والراجل والمراة
والشيبانية والشايب
لي تكلم فيه يردوه احمق
لي شاف وسكت رزقو بتسرق
ولي زاغ يضربوه بنص
يمكن يتجرح يمكن يهرس
يمكن بالزرواطة يتفلق
تنهشنا نهيش... وتنتف لينا الريش
وكثر القرقوبي ولحشيش
ولي مهاجر ماتلى اجيش
الزناقي عمرات بالفراشة ؤ قدام جوامع مزاحمين كي عرام تشيش
لي سولتيه مضيوم يتشكى وتحس بيه كيتعذب
يجري ويسهر ويشقى ولحمل تقال وعليه كلو تكب
ؤ لمحاينو ما تلا حد يحسب
الى دوى يتقنى ليه فخ ومقلب
ؤ يمكن تمنع عليه الماكلة والمشرب
ويعجبهم الحال الى شافوه كيتعذب
والنادر درسوه وعزلو منو حبة تنسيك في حبة
وتخارجو فيه تخريجت لمحبة وطمعو حتى في النقب
احبسني بويا ما خلاني نكمل لقوال
وجاوبني بكلام الحكمة فالحال
سولو ياولدي و يزيدو طرحو السؤال
علاش زمان تبدل من حال الى حال
الى بغيتو يتحقق ليكم المراد ويرتاح ليكم البال
كاين آمال لتغير الاحوال
والمستحيل ماشي من المحال
تسلحو بالصدق والوفا
عمرو قلوبكم بالحق وغسلوها من الباطل
الى بغيتو الخو يصبح على خوه عاقل
وطعامكم يصبح بنين ما مسوس ما باسل
ؤ فرقو بين الحابل والنابل
وبين الجاهل والعاقل
غادي الكل من نادركم ياكل
*** عبدالرحيم طالبة صقلي ***
تعليقات
إرسال تعليق