*مصابني*

تمنيت لو كان كنت ورقة مطوية فكتاب

تنور لعقول. وتزها أيام كل من قراني

ولا وردة مفتحة فبستان  هل الالباب

العارفين والدارسين فلكتاب الرباني

ولا ورقة فجشرة معلقها خالقها بسباب

تنقي لهوا وتخلي لعليل مرتاح وهاني

مصابني قشة فبحر موجو عاتي غلاب

 نصارع مواج الظلم الراكدة ونغسل فيه حزاني

مابيدي  حيلة فيما كان لي في المكتاب .

واجهل عيني دامعة من هول ذنوب مغرقاني

مصابني منامة فليل الصالحين الاغراب

ما عندها تفسير ولا روية عند عارف روحاني

نفيق منها نرمي ورايا كل عذاب

ونحيا حياة نقية تقية بحال قراني

حرت على من نرمي عاري يا لحباب

واش على كتفي ولا على زمان جفاني

تبعت غواية النفس ورفاگة شلة من لصحاب

نهار نغيب على عينيهوم كلشي ينساني

خليت طريق الطيرالحر وتبعت الضباب

غذر بيا ومن فوق راس الجبل رماني

اليوم فطنت بعيوبي وتفكرت يوم الحساب

حين ما ينفع جاه سوى الخير ولحساني

إلى توفيت. دفنوني.جنب ساقية ماها منساب

أو تحت شجرة ظلها ممدود على طول جناني

ولا دريوني ف صحرى ما يصيلني غراب

نرگد ونهنى بريحها الناسمة مكاني

كفنوني بالحمد وحنطوني بالذكر نهار لغياب

يشفعولي عند السؤال وما يغيبو على لساني

خايفة من ديك الوقفة .لا نخطى الصواب

طامعة ف حماية المولى هو لي بلعفو يتولاني

طلبت سيدي ربي مول الجود  الكريم الوهاب

يعفو عليا ويأتيني من فضلو نهار يلقاني

الحسنية لمدكر 🦋

12.5.2020