عَسَّتْ لَمْحايْنْ
~~~~~~~
عَسَّتْ لَمْحايْن مَقْهورْ
هازْ روحو فْ كَفُّو...
مْخَبْلا خْيوطْ الزْهَرْ
سيكيريتي رْجالْ العَزْ
تلڭاه مْعَسْكَرْ فَ الباب
نَخْلَة النًّفَعْ ضَلْها تامَرْ
مْضَحِّي ديما بْصَحْتو
كل ضَرْبا مْلَڭِّي دْجيهْ
شاربْ رْزانَتْ العقل...
حاضي صْوالدْ الناس
ليل ونهار فاني عَمْرو
ريح رامْياه ڭْروشْ وَكْلاه
مَرْشومْ حَقو المْحَتْحَتْ
مَهْموم...
مَنْكود...
مَحْڭور...
¤ليك الله عَسَّاسْ لَمْحايْنْ¤
هادَ قَلْ مَنُّو وْداكْ مَزْعوفْ
سَوَّلْ خيطْ الفجر عْليه
مْڭَفْڭْفاهْ نْجومْ الْيالي
عاسْ على ملاير نَّاعس
جاري تَّاعَسْ عْلى لَمْكَسَّلْ
عايش فوڭْ سَلْكْ مْتَلَّفْ
سهران لِّليلْ مْڭَمَّطْ سْراوي
مْحارَبْ عْدو الْبَرْدْ وَشْفافَرْ
كَوْياهْ حَرًّةْ الضغما الواحْلا
يْباتْ حاضي من شر الخلقْ
ويصبح مشمش مَڭْلي مْڭَيَّلْ
مْسَرَّجْ الرْزانا سْلاحو الصْبرْ
عمرو ما يسمع الشكر والتقدير
إِلاَّ لِّي ڭَلْبو سْميحْ مْأَصَّلْ...
¤ليك الله عَسَّاسْ لَمْحاينْ¤
ديما ڭْلوبْ لَحْجَرْ مْجَفِّينْ صْوابْ
مَحْطوطْ بْحال العَبْدْ المْشَرَّطْ
آمَرْ تَعْمَلْ تْكَتْباتْ مْحَفْرا الرَّاسْ
فين ؤُفين يًلْڭا لي يقدر ...
وكل زمان مايْخَصْ ناس الأصلْ
سَّاڭْيا تسقي الخاطَرْ المْوَعْتْ
شْحالْ تْعاوْدْ على المَحْرودْ...
طاجْ حَقُّو مَرْدومْ مَحْروڭ...
شْتَفْ مولْ صْوالدْ عَفْساتْ...
تكال عْرَڭْ المَتْعوسْ سَرْطاتْ...
عَضَّا هْنا وًهْناكْ سَمْناتْ اللَّهْفا
وَطْغى وْسَخْ الڭْرامَمْ عَمْياتْ...
¤ليك الله عَسَّاسْ لَمْحايْنْ¤
قانون يَحْميه باقي مْحَجَّبْ
ؤُخَلْصا مْحَجْرا الميزان...
بْعينْ عورا تْبَهْنَسْ ضْلامْ
تْفَرْتيتْ عْضَمْ يْرَيِّقْ جُّوعْ
مهضوم...
مدفون...
مَعْصورْ...
لا تأمين زينْ يْعَوَّضْ
وَلاَّ مَعاشْ يْكَرَّمْ الكْبَرْ
مَرْزومْ مْرَكَّنْ فَ القْناتْ
يْدَفِّي العمر وَيْرَقَّعْ...
آش فرق داكْ وداكْ
غير لْباسْ لَڭْراضْ
¤ليك الله عَسَّاسْ لَمْحايْنْ¤
كُلْها فينْ تْحَطْ مْجَنَّدْ
سْرابًسْ كُلْ مَرَّا فينْ...
تْسَخْسَخْ لَمْجاجْ المْهَرَّسْ
يَتْلاوحٌ فْيافي وَصْنادقَ
وْكالاتْ وْمَّاڭَزْ ؤوْزِناتْ
وَدْروبْ تَلْڭاهْ مْغَبَّقْ
مْكوغَطْ بْقَرْصاتْ سْمَرْ
حاضي حْديدْ نَّاس
ديما فْ خطر مْهَدَّدْ
عيون رادَّا بالْ هجماتْ
دْيابْ للِّيلْ وَتْعالَبْ نْهارْ...
ؤُبَزْهَرْ المْكَفَّنْ المَغْبونْ
دْزادَتْ المَتْعوسْ كْماما
ؤُهُوَ مَخْنوقْ خْلوقْ...
كورونا لَعْدو شَنْقاتو
مْنينْ يَلْڭاها المَزْغوبْ
¤ليك الله عسَّاسْ لَمْحايْنْ¤
مْلَحَّفْ لَباسْ الْهَمَّا مْبَسَّمْ
مْڭَرْفَطْ مْحَلَّقْ نْضيفْ
مْعَطَّرْ مَسْكْ بَعْرَڭْ حَقَّاني
تامَرْتَكْ صْفا عَزْ الْحلالْ
ليكْ سْلامْ والتقدير...
كُلْها خْلاصْ مْخَبِّيهْ الغيبْ
العينينْ سَّاهْرا كُل وْقاتْ
على راحتنا ديما مْجَنْدا
راسكْ مَهْزوزْ هَمَّا جْبالْ
لابْدَّا إيجي يوم فيه تْكَرَّمْ
رمي حمولك لربنا المنان
النصر والعز عنوان جْرَيْتَكْ
وْكُلْ نِضالْ ليهْ رايا مرفوعا
إِفَرْجْها الكريم العالي
إِفَرَّجْها الكريم العالي
بقلم محمد حديش
تعليقات
إرسال تعليق