الحربة
ايام كرام خيرها عم علينا
فشهر رمضان بالتمام
القسم الأول
سلام الله دام واجب علينا
تحية ردوا سلام
هلال الخير فالسما باين لن
طل علينا بعد عام
رمضان كريم بنورو هل علينا
شهر لقيام مع الصيام
جاد الجواد بفرح و هدية لنا
رابع أركان الاسلام
هبة من الله لكل المسلمينا
اثلاثين يوم بالتمام
غسال لقلب والنفس يداوينا
يعم السلم والسلام
رجاو الله بعد رحمتو يغفر لنا
ويجعلنا بزين لمقام
الحربة
ايام كرام خيرها عم علينا
فشهر رمضان بالتمام
القسم الثاني
طاعة الله واجبة
نرجعلو متايبة
ومعايا جميع لحباب
نوقف فبابو راغبة
ناجيه بلفظة مهذبة
إسلامنا دين الصواب
نكون فسعيي مأدبة
نسالو حسن لعاقبة
عسى دعاي يستجاب
باب التوبة كبير مفتوحة لنا
من قصدو لا يضام
الله كريم من فضلو يعطينا
السعادة وصحة لجسام
رقيب فسماه راه عالم علينا
والملايكة حاضرة مقام
بامر من الله ك تتزمم علينا
تخط لفعال بلقلام
نرفعوا لكفوف حتى يغفر لنا
ويغفر لجميع لنيام
نسالوه لعوين باش ييسر لنا
لعبادة وطاعة الدوام
ويعافينا من الحزن والغبينا
يحقق لنا الاحلام
الحربة
ايام كرام خيرها عم علينا
فشهر رمضان بالتمام
القسم الثالث
خطيك ذميم لفعال
وكثرة لفضول والسوال
كن مثبت وثقيل
لا تدخلشي في جدال
تفتح للفتنة مجال
اعقل لا تكنشي اهبيل
عليك بزين لعمال
وقيل قوم الضلال
جاهلة وصبرها قليل
جيت نوصيك سمع وصاية زينا
صغى وفهم للكلام
اخطيك لقوال واللفاظ المشينا
وقباحة اهل لقجام
لا تكثر مزاح الضسارة مازينا
تعود عليك بالندام
من جا عقلو هاج يحك علينا
نقولو عليك السلام
امسك لعصاب وبرد هنينا
عطي التيساع للخصام
فك عبستك تيساع الخاطر زينا
لاتخلي عليك املام
اعفو واسمح كيف وصا نبينا
الصفح سمة لكرام
الحربة
ايام كرام خيرها عم علينا
فشهر رمضان بالتمام
القسم الرابع
من سبك لا تجاوبو
أو خاصمك لا تعاتبو
تربح صيامك صحيح
عسى ضميرو يأنبو
يصحى من غفلة يعذبو
حين يلقى عيبو قبيح
من شيطانو غالبو
ساكن عقلو سالبو
ديما كيشطحو شطيح
محيح فالدرب صار داير روينا
كشوهة هازة علام
ماخاف الله غارقة لو السفينة
الجهل لاطمو لطام
يلفظ كلام شين عافتو وذنينا
والشر دايرو حزام
يتوعد بالويل كانو صايم لنا
جاهل بقواعد الصيام
بالحبس يسب والدعا على عينينا
كيتمنى مية عام
الإدمان معشش بعقلو دار روينا
و الجسم حامل للسقام
ضيع عمرو عاش حياة حزينا
كيما لعمى فظلام
ايام كرام خيرها عم علينا
فشهر رمضان بالتمام
القسم الخامس
إسلامنا دين الصلاح
صانوه الناس لفلاح
تقية إيمانها صحيح
الصدر به انشرح
ونسى أحزان ولتراح
وصبح صافي سميح
الطاعة تشفي اجراح
تحمل فطياتها فراح
واللسان بالذكر فصيح
خشوع فالصلا فرض علينا
إمساك اساس الصيام
التراويح سنة محمودة لنا
نداوم ساعة لقيام
ليلة القدر بخير طافت علينا
ملايكة حاملة سلام
ذكر الله في مساجد ومقرئينا
خثمو القرآن باحكام
زكاة الفطر خالصةوجبت علينا
يكمل الأجر بالتمام
قبل صلاة العيد كيف وصا نبينا
حسب شريعة لاسلام
محمد لحبيب طه قرة عينينا
عليه الصلا مع السلام
ايام كرام خيرها عم علينا
فشهر رمضان بالتمام
القسم السادس
المغرب راه باولادو
اليوم زادو شهادو
قالوا هذي ارض خير
ديما ينال مرادو
مايهموه حسادو
ولا شي عديم الضمير
مهما العديان كادوا
بخيبتهم عادو
ومن جرب تيحير
للتضامن جميع راه درنا يدينا
وشركنا ملح الطعام
زور بلادي كل قرية ومدينة
تلقى شبابنا همام
فوقت الجد زعيم ديما مكبر بينا
عارف لحلال من حرام
الشهامة والعز وصية والدينا
والعزم دايرو حسام
ونعم الأخلاق هي فاش اربينا
صرنا خيرة الأمم
أوصاف شباب بلادي لي يهزو بنا
وعرفوا موضع لقدام
ماشي كمن جا مقطوع يهدد فينا
و فيه قبيح لكلام
الحربة
ايام كرام خيرها عم علينا
فشهر رمضان بالتمام
القسم السابع
بهد الجايحة قانطين
إلا من رحمتك واثقين
ترفع لبلا يا رحمان
حنا برحمتك طامعين
والمسلمين كاملين
وجميع بني الانسان
مايبقى حد بينا حزين
ننجاو نفرحو كاملين
فهذ الشهر درمضان
لقى رمضان جايحة دارت بنا
جاتنا من ارض لعجام
شلا شروط راه فرضات علينا
كورونا دايرة نظام
النيف مع الفم بالكمامة غطينا
و صار لخروج بالقوام
فجميع الاوقات تانغسلو يدينا
و بعد غسيل تعقام
مانعاديو حد قريب مايعادينا
نتركو مسافة الزام
هذا ظرف صعيب جانا غريب علينا
ماكان عالبال يعلم
نسالو الله الرحمة يشفي وينجينا
يرفع لبلا ولسقام
يعم الخير تعود الحالة زينة
نحييو صلة لرحام
نزور ارض الحمرا سرها داير بينا
ياقوتة فيد لريام
ربيع البهجا اسمي بالبطاح الزينة
لزهارو كاشفة لتام
قالت الزيات قول مدادو يروينا
شرابو شهدة مدام
و احلى شربة تكن من حوض نبيا
عليه الصلا مع سلام
مع آلو وصحبو جميع و الصالينا
ننعمو جوارو مقام
----- تمت بحمد الله ---- مراكش في 8/5/2020
تعليقات
إرسال تعليق