مسكونة
مسكونة أنا من زمان
ساكناني جنية قوقية
سالبة عقلي
الحاجة مليكة المرضية
مولاة الشعور الذهبية
مولاة الحناني الوردية
على راسها ريشة
وعلى صدرها دواية
ملي كتهيج ،تقولي لي
كتبي يا أنسية
كتبي اللي عليك نفتي
ولا ،حق رب أبي نواس
والمتنبي وأبي فراس
حتى نضربك بين
القلب والرية
ونرميك ونجليك
في روضة منسية
مايدوز عليها جن ولا جنية
ولايحاديها إنس ولا إنسية
كتبي،جدبي،تحيري
خليني نجدب بلا هجهوج
ولا طبل ولا قراقب
بجوج
خليني نعيط على الملوك
ها ميرة زينة البنات
ها الباشا حمو الجزار
الشارب دمو
هاميمون ،ملك
وزين الجنون
خليني نهيم بقصيدتك
اللي هي كلام رقيق
محكوم وموزون
وماشي هضرة
احمق مجنون.
جميلة أم اليتامى.
تعليقات
إرسال تعليق