الله عليك يا حرفي
ضعت وسط الجوقة
كل واحد يلغي بلغاه
هذا يبكي على ليلاه
و الثاني يشكي
من حر هواه...
و أنا يا حرفي
غزلتك هم ؤ غم
القهرة والحگرة
و فراق الأحباب
آه يا حرفي
كل نهار ندندن
بلغايا و نحلم
يسمعوا غنايا
قالو الدنيا هانيا
ؤ بالحب سايرة
يبات بلا عشاه...
آااااه الدماغ مكلخ
والعنين مبرقة
هذا مشى
ؤ هذا جاء
ولا من رد البال
ليام دايزا
و الحال هو الحال ...
دندن يا حرفي ...دندن...
مالك يا حرفي
تهت و تلفت
وسط لعقول الشاردة
و القلوب الجافة
كل يوم ؤ انت في حال
صاحبي راه
حرفي و حرفك تاه
والصمت عياه...
يوصل للحلق
باش ينطق
يتخنق من غير هواه
تاه الحرف ؤ ضيق
لخناق وسط صدري
باغيا ندوي...
نفوج على قلبي
شلا حاجات
هدت نصي نبات
بلا نعاس...
كل مرة نقول
نطلق حرفي
يسرح يسري
يوصل لغايتو
نلقاه تهرس
بلا فاس...
نرجع ندخل
سوقي ؤ ما ندوي
عيني تشوف
ؤ قلبي يبكي
على ولدي... و حفيدي
و على ناااااس
ما جابت خبار للدنيا
هذا عطاتو
ؤهذا هدتو
ؤ ما كاين باس...
ابكي... اشكي...
و شكون سمعك
ولا واحد سولك
ياك لاباس... ؟
ما عندك باس...
آه منك يا حرفي
الخوف ركبك
مالك تلوي و تعرج
راه ما كاين فراج...
مليكة بوبراهيمي
تعليقات
إرسال تعليق