فقلبي غصة بقلم يزيد علوي اسماعيلي

فقلبي غصة ما برات *

مغروسة شوكة ما شكات *

القلب مخبي سرارو ★ و انا نعاني ف كيّتو

شهقة طلعت ما حكات *

و دمعة طلّت ما جرات *

الجفن حاضي شفارو ★ ما راد تبان ليعتو

الحروف حمات ما جفات *

اختارت الراوي باش جات *

بكلام ما خاطي عبارو ★ و لا بدّل سيفتو

قصيدتي لا حس لا غوات *

و لون قريض ما بهات *

المعنى ظاهر في شعارو ★ عساك تشم ريحتو

★★★

هاذ الدنيا شنو سوات *

ياك اللي جا گاع مات *

كلها ساير في مسارو ★ حتى يلقى حفيرتو

فرعون طغى في حياة *

   و شفناه ضعيف حين مات *

ما صاب جنود معاه سارو ★ و غطى البحر رايتو

سالو التربة شنو طوات *

           و شحال فيها من رفات *

ما بقات وراه غي خبارو ★ يلا داير شي ف سيرتو

سمعني يا غايب في سبات *

           واش ضامن فين غا تبات ؟*

لا واحد بيدو عمارو  ★ مهما كانت صفتو

كذاك الشمس مهما ضوات *

           تراها ب عشية مشات *

و النهار تطفى لو نوارو ★ و يتغطى في ظليمتو

اسمع الكلمة يلا دوات *

          و فهم المعني و ما طوات *

رَ من قبلك آش دارو ★ يا من ملهي ف زينتو

★★★

شحال من قبلك جا و فات *

         و على غفلة طاح مات *

ما بقات اليوم غي خبارو ★ و حفرة جنب قبيلتو

قالو ظالم كان عات *

          ما حن البو و لا خوات *

مشى ما الدا معه دارو ★ لا مال و لا گريمتو

ما رفق ب مِّيمة بكات  *

         و لا بيتيمة عرات *

خصال الخير فيه بارو ★ ما لاهي غي ف عيلتو

مثال هاذ الناس شنو جنات *

        و للآخرة شنو خدات *

الشراني مشي لنارو ★ و الكريم يدخل جنتو

يا مولى حسن الصفات *

        استجب كفوفي يلا دعات*

عبدك صحح لو مسارو ★ تكون الجنة دويرتو

يزيد علوي اسماعيلي