★ ( حمو و لالة هدى بعد التنقيح ) ★
★★★
الحربة :
سمع ما صار خود قصة معتبرا .
فخصام يحير الفكار .
★★★
★القسم الأول : الحاكي ★
لبارح عند الضحى و فالوقت العشرا .
رواحي كان للوكار.
سمعت حمو الجار قايم لمحضرا .
بدوي ونقايمو كتار .
عرفت هدى كتحك على الدبرا .
مراتو بنت الحضار .
تعجبك فالنكير ووزان الهضرا .
وحمو لكلام بالعبار.
قلت نسلي الروح ترتاح و تبرا .
ولوح الهم و الكدار .
حضرت آوان ما لزمني في مرا.
فشروط آتاي بالبتار.
جلست لقيت عاد كبرات الجرا.
سمعو ماصار يا خيار.
★★★
الحربة .
سمع ما صار خود قصة معتبرا - آ سيدنا .
فخصام يحير الفكار .
★★★
★القسم الثاني : حمو .★
نهار دخلتي لساحتي * مشات معاك راحتي *
صبحا ومسا مع الغوات .
رجعت ْشفايا فحومتي * قبالة جاري و جارتي *
يا هدى هيبتي مشات
و على قدي و قامتي * تبغي نرفع رايتي *
والله آ فيه لا بقات
ما فيك صواب ما تراعي للعشرا *
ما تصوني عهد الحرار .
بفتيل سخون شاعلة كيف الجمرا *
و حتى من جا يفك حار
آش الداني لشي مدينة بالمرّا *
و القرية بناتها خيار
ما يعرفو جوّال لا رسايل متشفرة *
غشمة ما جابو خبار
دعيتو لله من عطاني د الفكرا *
قال فالمدينة جي ختار
بعت النعجة و كبش و زدت البگرة *
و مشيت نسال كل جار
خرج ليا بوك تم تبعتني حسرا *
مصاب تلفت عل الدار
★★★
الحربة :
سمع ما صار خود قصة معتبرا *
فخصام يحير الفكار
★★★
★القسم الثالث : هدى ★.
عشت وقاتي براحتي * في دار اهلي و خاوتي * ماكان صداع لا غوات
جيتي سلبتي منايتي * من وسط اهلي و لامتي * قالو خيري تزوجات
فرقتني على قرايتي * و ما تستهل حداگتي*
عدياني فيا شفات.
عيشة القرية لا لي عنها فكرة *...
ولفت معيشة لحضار. ..
وسط الدوار عيشتني فالحكرة *...
عندك عُشة و قلت دار
كثرة لحكام زيد تخسار الهضرة *...
كلماتك حارة جمار
طلقي النعاج ،سير حلبي فالبگرة *
وشعيل الفرن بالغبار
يلا قلت عييت سار داير لي حضرة *...
وحديتي عند كل دار .
راني ملّيت ما بقى صٓبر بمرّة *
دعني بسلام دون عار
ما كرهت اليوم نفكّو هاذ الجّرة *
ما نزيد ليلة ف دالكدار
★★★
الحربة :
سمع ما صار خود قصة معتبرا - آ سيدنا .
فخصام يحير الفكار .
★★★
★ القسم الرابع : حمو .★
تعاملي بعمايل العدا ... عييت بدون فايدا ... ما زايدة غير فالعناد
طول صباحكك راگدة... تفيقي عبسات عاگدة...و لسانك قارص الزناد
مع آلو معاقدة ...يومك كلو معاودة ... لسانك صاري بلا غماد
حسبتك زهرة يا مرا كيف الگمرا *
طلعتي سدرة بلا ثمار
بجفونك سالبة و العيون الخضرا *
وتشكيل هذاب و الشفار
و خدود كم الورود و شفايف حمرا *
وكلام قليل بالعبار
من بعد ايام انكشف زورك و عرا*
طار داك الزين كم البخار
لا عيون ملاح لا حلاوة فالبشرة *
ما فيك حقيق كالظفار
و عيوب كثار راه بانو بالوفرة *
لا ملحة فيك لا بزار
سافرت ميال و انتي سوم العبرة *
يقطع جدرك يا الكار
★★★
الحربة :
سمع ما صار خود قصة معتبرا - آ سيدنا .
فخصام يحير الفكار .
★★★
★القسم الخامس : هدى★
حمو ما فيك فايدة ... وانا لشقاك صامدة ... و حلف حملك لا تقاد
ونتا كسدة و جامدة... ما فيها حاجة مگادة ... لا عدة ليك لا عتاد
نحكي و الناس شاهدة ... خصامي ما هو معاندة... وعنادك غير ما تزاد
نبكي من ليعتي و نقول آ حسرة *
و نتا ما جبت لي خبار
ما صبت هنا و لا ف داري كالحرة *
ليلي و نهاري مرار
لا راحة هانية كما راجل و مرا *
بين دالربعة من لسوار
ما تهز كتاب ما تخطط ما تقرا*
جاهل ما قاري سوار .
بالليل تجي تفوح ريحك لمزفرة *
حوايجك كلها غبار
ما تصغى لي شكاي ما تسمع هضرة *
قلبك قاسي كم الحجار.
تقاضا صبري عييت من هاذ القهرة *
شكيت لرافع لقدار
★★★
الحربة :
سمع ما صار خود قصة معتبرا - آ سيدنا .
فخصام يحير الفكار .
★★★
★ القسم السادس حمو ★
تعايري يا عرةة النّسا ... يا العروسة العانسة... لا نسمة فيك لا وناس
العبسة لك حابسة... و الحسرة فيك گالسة... لبسك ما هو كالناس
ضحى و مسى ناعسة... تشبهي لمرا النافسة... مدسوسة و ما فيك باس
كالحرباية كتلون ف النظرة *
تفتن و حيالها كثار
ريتك زينة و لون ظفراتك شقرا *
طلعتي قرعة بلا شعار
بعد الدخلة صحيت لقيتك صفرا *
آش جرى فيك واش صار
اللب مشى بقات لي غير القشرة *
و الزين اللي كان طار
صبرت و قلت مالزواج الا سترة*
مكتاب رضيت بالقدار
من اول يوم حرقتي مرق الگدرا *
و عشانا كالتو النار .
يا العروبي تسنط و خود العبرة *
المدينة زواجها قمار .
★★★
الحربة :
اسمع ما صار خد قصة معتبرة
فخصام يحيبر الفكار
★★★
★ القسم السابع هدى ★
أنا ماسة من النسا ....و نتا ضرسة مسوسة... لا بسمة فيك لا حساس
سوسة سنيك غارسة..مبسم ببسام عابسة... لا لسان حلو كالناس
هو
ما نا يا بيك حاسة.... ايا كسدة و يابسة....لا فرح معك لا وناس
معاك أ حمو حرقتني شمس الوغرا *
و محنتي ما لها قرار
لا ضو على ضياه لا ما بالوفرة *
و زايد داير لي حصار
لا تلفزة ولا زهو وا لا سهرة *
لا هزل معاك لا حوار
غشيم و غري باجدي ما لك خبرة *
سبقوك الناس بالطوار
الجرح عميق ما نظنوشي يبرا *
منك ما طالبة عذار
انا راني عييت بدواز و خضرة *
وحطب وعجن فالسحار
فرقني لله فيك راني نتبرا *
بلا نفقة و لا عقار
★★★
الحربة .
سمع ما صار خود قصة معتبرة *
فخصام يحير الفكار
★★★
★ القسم الثامن : حمو ★
من يوم دخولك البيت * لا قلب برا و لا هنيت
كيتك كية و لا برات
ما تفهميني يلا دويت * فجوابك ديما نسيت
لبصيرة ليك را عمات
بالهم فنيت و رشيت * بعد ردمتي ما بنيت
مشات حلاوة الحياة
عامي لبصار شوف حالو كيف صرا*
ما يجي منو سوى الضرار
لٓغْصَن لَعوج مال بسباب البذرة *
و بذرتك لبها غمار
السهل يسير و نتي طريقة عترة *
ما تنبت فيها ازهار
الشك عماك بيك غادي للحفرة *
و يمينك كلها يسار
لا لسان سليس لا حلاوة فالنبرة *
صياحك فايت النفار
ديما تشكي من الحساد بكثرة *
علاش يحسدوك ها العار
لو لي قدرة نجيب فالحين الضرة *
و نحطك وسط العصار
★★★
الحربة .
سمع ما صار خود قصة معتبرة *
فخصام يحير الفكار
★★★
★ القسم التاسع : هدى ★
آحمو تريكت أو خزيت * * كيف جرالي حتى رضيت*
على مهبول كيف جات .
لا كسوة ساوية شريت * * معاك آ عايب الحديت *
يعطيك الدل و الشتات.
تسلطت علي ما نويت * * يجمعني زهري فبيت *
مع ديب منيتو الشات *
........
ديما مخنوق ما نفرز لك هضرة .
لا لبس يزهي نضار .
خارك كبوط فالصمايم و السمرة.
السروال صدايفو سمار.
و گدام شقاقها زگاوة للسخرة
وصباع مشنقرة ضفار.
جيت لدارك صبت براد و كدرة .
و فراشك خاصو النار.
فزريبة خاربة هلكتك بالقطرة .
عايش مدفون كي الفار .
.
تعاير فيا و ما حشمتي يا عرة .
ما قريت وجوه لا وقار.
وانا لالاك بنت سيدك مشتهرة .
سقصي لكبار و الصغار
★★★
الحربة .
سمع ما صار خود قصة معتبرة *
فخصام يحير الفكار
★★★
★ .القسم العاشر . الحاكي ★
غنمنا فرجة موهجا. . شهوة منها مبهجا .
ولكريم يجود بالفراج .
مرحنا داخل الحجا . . والهم نزاح و نفجا .
وخرجت نوقف اللجاج .
لقيت القوم هايجا . . هدى بالفاس رايجا .
او حمو هاز الرتاج .
دويت و قلت يا حبابي فالجورة .
لله نهيو د الكحار.
زعما حمو راك من نعم الشجرة .
تشبه لجدادك الحرار .
عرفتك درويش و مولف بالسترة .
وليتي غير فالغيار .
أنتي هدى أهيا بنت الكبرة .
مبشورة عند كل دار .
أنتي زعما بنت لحضر و الحضرة.
لعقل و العز و الوقار .
لازم تتسامحو قبالي د المرة .
ما باغي منكو حزار .
حمو لأصول عرفها ترفع لمرة .
سبق بسلامو وشار .
قال الهدى أنت فقلبي كالكمرة .
أنتييا الري والشوار.
ردت هدى بقول كافي بالمرة .
تاج راسي قرة البصار .
أنت ليا و ليك أنايا سترة .
أجي ننساو د الغيار .
واستغفر الله للغني مول القدرة .
فختام نهاية الشطار.
ما كاين حمو و لا مراتو يا حضرة .
غير فراجة من الدرار.
قصيدة من خيال ترصيع الفقرة .
تلاتة شركوا فالشعار .
الزيات فهدى نبات ربيعة حرة .
فالبهجة طيبها شهار .
يزيد فحمو ضوى العلوي شهرة .
شريف قصبة النوار .
اخليفي حاكي خديم ناسو والعشرة.
فيلالي طايع الحبار .
نهديو سلامنا بلطياب العطرة .
لشياخ الوهب و البرار .
الله مصلي عل النبي زين البشرة.
محمد سيد البشار.
و على آلو مع زواجو و العشرة .
و سباطو لامة الحرار .
★ تمت بحمد لله ★
Mustapha Khlifi
ربيعة الزيات. Yazid Alaoui Ismaili
تعليقات
إرسال تعليق