★★ ما يهمك ★★
شـــــــــــافوني نكتب و سوّلو : بشمن صفة ؟
واش شـــــــــــاعر ولا زجال او مجرد طيف ؟
قلت لهم جواب خفيف في كلمـــات لطيفة
غير هــــاوي عاشق لشعار ، و كَــنَكتب بالكيف
مانا ضــــــــالع في العلوم والا كثير معرفة
مانا استــــــــاذ فالجامعة و لا ذكتور بزيف
عــــــــامل عادي فالمعمل و ما نبدل السيفة
نخدم بعرقي و عـــــــــايش راضي و عفيف
مـــــا وصفت كلامي بكمال ، مانا شيخ الحرفة
مــــــــا عطيتو لك بكلفة و لا فرضتو بالسيف
يلا نطق قلامي و هداني شي حروف نظيفة
نبصمها بـإسمي و نديعها ، و هــــــــذا تشريف
يلا عجبك حرفي خُدُو ، و قل هـــاذي غ عطفة
و يلا مــا عجبك نســـــاه و دوز كظل خفيف
لا تشـــــــارك معـاه گصعة والا تحط مغرفة
و لا تشرك الملح و معاه لا تقـــــــــاسم رغيف
سد بـــــــــابك عليه و حجبو بستـــــار و دفة
و مــــــــا تلزم راسك بشي مـــــا حتاج لتكليف
تجــــــــاهلو و تحاشاه و بالصّد اعطيه و الگفا
و دير راسك صْمَك ، بْكَم ، اولا گـــــاع كفيف
و سِر نقي ف شعـــــار لذاك من يستاهل لوقفة
و اختــــار من يهوى قلبك ، او لو اسم لطيف
قبل مــــــــــــا تقرا لُو علّق او جمجم بخفة
باش يزيان الحـــــال و مـــــا يعود فـالشعر نزيف
جمجم لُــــو و يجمجم لك بِتجمجيم السلفة
او علق تعليق الـــــزيف و لا تروم لتسويف
مـــــا يهمك الكلام اشْ قــــال ما تهمك العفة
العفة مـــــا هي غ شعـــــار من شعــــار التخريف
جـــــــــامل صاحبك و دهنو و خلي بالك يصفا
وَ لَو حط كلام رخيص و النـــــاس فيه تعيف
آش يفرق فراش الصوف من حلاس الحلفة ؟
واش يفرق خرير الواد مع النعيق و الحفيف؟
كل من خير و شر ، يبدا بقدفة من نطفة
و من نطفة يقدر يخرج كل واطي و شريف
كلشي راه باين واضح و حتى شي ما يخفى
ياما من يجني مشماش فالشتا(ء) و فالخريف !!
مع تحيات :
يزيد علوي اسماعيلي
في 20 يوليوز 2020
تعليقات
إرسال تعليق