. ★★★الزين الفتان★★★
غطيني وسط لَجْفَان .... أيا الزين الفتان
العفة و الايمان ..... زِينك هبة ربـــاني
فهواك راني ولهــان ... و غرام الرِّيم بْلاني
**★**★★★***★**
واش راك جاهل يا لَايَم أني متيم وَلْهان
وحبي لك من زمان .. من وانا صغير نْعاني
قصتي على كل لسان... و ف عينيك بَرَّاني
***
لالة يا بنت لكرام ... يا حسنا(ء)بين الحِسان
دَان بين الكيسان ... بْهَا و جمالك مرجاني
صدر ملقح رمان ... يْرِيتُو ينضج ف حْضاني
***
يا ســـالبة لبي و عقل ...حنِّي حْتَانا انسان
سقيني حب و حنان ....تتحقق لي امــاني
نسعد نْوَلِّي فرحان .... و ندفن كل حزاني
***
ربي وحدو مَن يْعلم ...من صباي وَانَا فنان
قلامي ديما ف بْنان ... مَحْياك ديما ف لواني
عايش وحدة و احزان...و عليك كان رهاني
**★**★★★**★**
يا حاكم فصل و حكم ..حبها عليا سلطان
معيشني في لمحان ... و شوقها راه عماني
مَكْسِي وانا عريان...و رجعت شفاية ف زماني
***
لله يا زينة لَقْوام .... يا اميرة بالتيجان
جاه و صولجان ...و عرشها غرسة ف جناني
قصرك مالو حيطان ... بَانِيه - انا ف فْناني
***
خدودها ياقوت قاني.. و جفانها بالكحل غزلان
طيبها ريحْتو ريحان...و ريح لنسام غواني
خلاني فاهي سكران ... ما طقت نبرح مكاني
***
لله نظري للحالة ... و سمّْعيني الصوت الرنان
كتبي لي و لو خطان .... يحركو لي وجداني
قودي كوني ربان ... راضي و قابلك قبطاني
**★**★★★**★**
لا تسمعي كلام المغيار ..الواشي و كذاك الزنان
من يامو كلها بهتان ....و عاش حياتو أناني
ذاك فاقد كل اتزان ...و فعلو باين شيطاني
***
قبليني لالة و رضاي ...نجيك فارس عالحصان
قايد سرب الفرسان...بقميص لابسو عثماني
متباهي بين الخلان ... و نجاهر ، الزين بغاني
***
جوج جوج انا نهديك...شربيل بطرز القفطان
صندال بلون الفستان...محمولة فوق صواني
مشموم نوار و ريحان.... ربي برضاه حباني
***
اما الصداق الف مثقال...و زيدها كباش و تيران
نعرض عالأهل و جِّيران ...البعيد فيهم و الداني
و الله هو المستعان .... نزيد و عيني ميزاني
**★**★★★**★**
و نقول لِكل من هو سال ... علوي ما هو مَنَّان
إِيْلَا نزيد سعدي يزيان.. نلقى حبيبتي ف ركاني
و نقول للرفگة و اخوان...ربي بغاني و عطاني
***
خلوقي بمدينة فاس... قصباوي في واد ويلان
طنجة فيها لسكان .... كثير ناسها يعرفوني
بلادي سلم و أمان ... من غرفة اللي ولدوني
**★**★★★**★**
نختم بالرحيم الرحمان خالق جميع الأكوان
هو الكريم المنان ... جاد بجودو و عطاني
و الخير عليا بان .. و وفّا لي في ميزاني
***
والصلاة على نبينا .... رسول انس و جان
هو من جا بالقرآن.... النبي الامين العدنانِِ
عطاه الله البرهان .... بالحكمة و ِ البيانِ
★★★
في 29*11*2017
بقلم : يزيد علوي اسماعيلي
تعليقات
إرسال تعليق