★★ عدّا القياس ★★ ★★ قلم و اداء : ★★ يزيد علوي إسماعيلي ★★

قصيدة ★★ عدّا القياس ★★

★★ بالصوت و الحرف ★★

قلم و اداء :

★★ يزيد علوي إسماعيلي ★★

★عدًا القياس ★

لبس كرافاط و بدلة *

كأنو عريس الحفلة

جات البدلة عليه مقاس *

و السباط كلاس

هز شيكات و عملة *

متباهي ف اجمل حلة 

داخل يتمايل  بمياس * 

و فعينيه  حماس 

على مدام ما قال لا * 

يرى في راحو رجلة

عمى و ما شاف الباس *

و بضلال تابع خناس

 ذاق القدح و التبلى* 

و نسى اتجاه  للقبلة

و من يقصد ملهى دالاس *

عرفو غي فسفاس

ساق ساقو للزلة * 

و باع دينو و الملة

ما تكايس على كاس *

لحين مال و داخ الراس

مال مالو للحجلة * 

و الغرامة بالجملة

و ما حس براسو لاباس *

لحين عنق و باس

غنى  رقص تسلى * 

هايم غايب يتفلى

و مشارب من كل جناس * 

مع قطعة و گلاس

طال طوال الطلة * 

 لحين فجر بان و علا

راه فوّت عدّا القياس*

 و  جيبو خوى و تساس

جات دوخة على غفلة *

 و بدا في خطاه يتلى

غاب سمعو و خراس * 

و دقو ف راسو لجراس

الثملة طيش و علة * 

 كساد ما لها غلة 

طاح دايخ فاقد الاحساس *

و بين الناس انداس

طاح راسو و تدلى  * 

و ضاع مخو و تجلى

بالكاد يطلّع لنفاس *

و ما حاسس بالناس

كلشي طل و ولى *

 لا نديم و لا حجلة

و من طاح سومو يبخاس*

 كيف عود بلا ساس

وحل وحدو ف الوحلة * 

ف ليلة كانت كحلة

دخل بمالو زاهي ف لباس*

 خرج عالن افلاس

حاطت به جقلة * 

مريض و صحيح ف سلة

كما برمة ك كسكاس *

طايسين طاسة في طاس

غابت عليه الشلة *

و صار ضحكة للقلة 

لاحوه ف الباب الحراس *

و تما الداه نعاس

عليه دارت القولة * 

فقول بقياس و قفلة

 لما يسكر العباس *

يزهى عليه النسناس 

يزيد علوي اسماعيلي