★ أنا و گَلبي ★

★ أنا و گَلبي ★

يَحْسَن  عَوْنَك يــــا الگلب المكْوي بْ صْبـابة ★

                تْعَــــانِي  ف ْهْموم  و ْوحدك  تْداري لَعْذاب

حْبيبك مـــا داري وْ دايْر عْلى لَـعْيون عْصابة ★

                  ما نـــاظر حالك وِ خْيــالك حَجْبْو بْ حْجـاب

 مـا تبسّم  بْفَــاه وْ لا فَــــاه بْكلْمة مَصْوابة ★

                 و َنْتَايا  تَبْغِيه  و  تْســَـال  عْلِيه  يْلا  غَــاب

دِيمــَــا  لِه تْشِير  بِلْوَاحَظ  تَسْبَق سبَّـــــابة ★

                وْ نْتَـا مـــا تَعْيا يَــا گْلِيبي وْنَا صَدْرِي طَـاب

 كْتَبتْ قْصِيد رْفوف لْحِين صـارت تَشبه مَكْتابة ★

               وْ قَلْمي ناح وْ ساح وْ من نِيران شْواقي ذاب

مــا عـدْتْ  نْبَالي في  قْواعد  مْرَام وْ سرَّابة ★

              وْ رَاسي ما رَاسي عْلى كْراسْ نْوَاعر و ْحْراب

طول دْجَى يــا گلبي نْقول لك  اللوعة  غلابة★

              وْ نْتــَا  كل ّ فْجَر  يا گْلِيبي  ترسل ف ْجـْواب

 هُوْ مَا يقرا مرسال ، عِين مغشِيَّة بِين ضْبابة ★

              و ْمَن عِينو  مطموس لا  تّسَـنَّى منّو  لَوْجـاب

رْمِيتُو بالرَّمشة  وْ عِين عـــاشق  ديما  زرَّابة★

              وْ قْبل مــا يْوَصْلُو وْمِيضها فْتَحْت  لْقِيتُو  ذاب

مــا يَفْهَم الغمزة و ْلا يْشارة فْ سْطور كْتابة★

             وْ نْتـا يـــــا گَلبي غِيرْ سَايَگْ  ْمْعَلّق  بْسْراب

يا الگَلب  المفتون كُن  تسمع هــَاك الشطابة★

.           وْ نقِّي لَرْحــــاب  منْ لْواعج  و سدّ الْبــــاب

حتى تْروح  الَّلوعة وْ ما تْعُـود وْ تـهْنا يـا بابا★

             و ْمــا تفتح  الباب من ثـاني  لْمَن كان سْباب

تْعقَّل  يـــا  گَلبي  وْ دِير  عقلك  عْلِيك  نْيابة★

             وْ لا تْحكَّم گَلبك يا  گْلِيبِي  الْگَلب رَاهُو سـاب

وْ يْلا  تعانَدْني  يــا گْليبي نَرْمْيك  ف غَـابـَة★

             و اللِّي طاح فْ غابْ رَا مْصِيرُو تـَـاكْلُو لَذْيـاب

نَخْتم الحكــــــاية مْع الگلب المكْوي بْصْبابة★

.           وَنَا نْداري  لَهْموم  وحدي و نْعــــاني لَعْذاب

گَلْبي مــا داري وْ دايْر عْلى لَـعْيون عْصـابة★

             لْحــالي ما ينظر وْ يْلا شْكِيت يَحْسَبْني كذاب

             ★يزيد العلوي الإسماعليلي ★

                 الخميس 16 أبريل 2020