★★ قلبي ف هيامك رشا ★★
قـــــــلبي بهيامك رشا * و سقام الغرام تفشّى
بــــــــه نفطر و نتغدي * و به ف مسا نتعشى
كـــــان قبلك قلبي ملكي * و يوم شافك مشى
ملكتيه مـــا بقى لي منو * سوى عصبة ف غشا
★★★★★
يـــــا خاطف قلبي مني * خاف من الله ، اخشى
را رمـــوش عيونك رصاص * صابتني في الحشا
ياك قلبي خدتيه عروق * والعقل ف سبات غشى
لـــــــــما را درعين ملاح * مع حناني بالنقشة
★★★★★
عييت نخبي و نـــــــداري * و اليوم القلم فشى
و مـــــا بقات وراقي بيضة * من مدادي عطشى
غير نشوفك يا الهلال * تصير في بدني رعشة
و مـــــــــا نبوح لحد بسري * والا نحب الفرشة
★★★★★
خــــــــادوني لطبيب عصاب * فالتا ليه النقشة
قـــــــال لهم هذا مصاب * عطوه الدوا بالكمشة
حيث شــــافو ما نفع دواه * حين ساليت الخنشة
خـــــــادوني لفقيه عور * مــــا فهم والا نبشة
★★★★★
الفقيه قــــال هذا ممسوس * راه ملكاتو عيشة
بخروه بعود و جــاوي * و سقوه بمـا(ء) المرشّة
هلكوني بدخـــان بخور * تقول يحاربو في هيشة
و كل مـــــــــا انا نتوجّع * يزيدو حْجام الرشة
★★★★★
دوروني شلا طبّا * و كـــــــــــل فقيه ف عشة
حتى مــــــــا بقيت نقدر نفيق * او حتى نتمشى
كل مــــــــــانا نتعب نطيح * يفيّقوني بالطرشة
كــــــــل ذاتي صارت ندوب * بين جراح و خبشة
★★★★★
عييت و مــــــا قادر نصبر * قلت آش هاذ العيشة
جعلوني حقل تجارب * و حـــــالتي صبحت ورشة
قلت لهم يـــــا قوم هداو * سمعو سباب الرعشة
راني مــــــــــا انا مهبول * و لا مسكون بعيشة
★★★★★
قـــــالو لي قل نسمعوك * و ف عيونهم الدهشة
قـــــلت لهم راني نعشق * و فؤادي بغرام رشـــا
كذبو و نظرو بــالغبشة * و ظنو كــــلامي وشة
تغـــامزو عليا بالرمشة * و عين الجـــاهل عمشة
★★★★★
حــــاشـــا يلا انا نكذب * و لعيونهم نتحـــــاشى
حيث عالق ف بحر لغرام * و نســال مدد ف قشة
ك ندير و الحبيب بعـــــيد * و عندي الكبدة هشة
هــــــايم و ما يفهمني * سوا من عـاش الوحشة
★★★★★
★ يزيد علوي إسماعيلي ★
تعليقات
إرسال تعليق