بارك الله فيك الأستاد يزيد على هذه القصيدة الرائعة الماتعة في معناها و مبناها .
........
★بغيت نتعلم★
علموني
علموني كيف نجمجم و كيف نعلق
على كل قصيدة و لو بركاكتها تقلق
المهم نبان كنعلق
علموني كيف نجامل و كيف نتملق
كيف نزوق كلامي بالنفاق و النمق
و على كلشي نعلق
علموني
بغيت نبان ظريف و مزيون و مخلق
عزيز و غالي و محبوب نحمق
و كلامي بالتاويل مسمق
علموني بغيت نجرب ربما القضية تصدق
و نلاحق الركب اللي راه دارها و سبق
و نلحق السربة و فيها نلصق
علموني
علموني ما بغيت نبقى مغمور مدرق
بغيت نبان و سلالم الشهرة نتسلق
بغيت حتى انا نحلق
علموني نغزل من الحروف كلام مخربق
من دون قواعد ما مفهوم ما لو منطق
المهم به نبوح و نتشدق
علموني
علموني نولي جبهة و على كل منابر ندق
و نعرض حروفي و لو واكلة شلّا من دق
المهم نطلع و نتبندق
علموني كيف نسرق و على كلام غيري نغلق
ناخد من هذا و هذا و نطرز ديوان ملفق
و نولي شاعر بالورق
علموني
علموني نلاقي كفوفي نطبل و نصفق
حتى على اللي لقى قصيدة و ما عليها عرق
و صاح بما جا على لسانو و طلق
علموني نعلي فالصوت باش نصيح و ننعق
يسمعني الغادي و الجاي لما نوقف و نشهق
و اللي سمعني يتحرق
علموني
علموني ننسى القياس باش ما نعود ندقق
خسرو لي ابرة المكال ما نلقى باش نحقق
راه من دقق نعتوه احمق
علموني يلا رفضتو راه روحي اليوما تزهق
اولا نبكي و بدموعي القبايل كاملة تغرق
و ما نحن فيكم والا نعتق
علموني
علموني سر الحرفة نفوح على قراني و نغمق
و نجيب شلا شواهد من غرب و مشرق
راه هادشي ما نعشق
علموني بغيت الاوسمة و الشواهد عليا تدفق
و ناخد شهرة بلا ما نتعب فيها والا نعرق
و نشوف صورتي ف كل ملصق
علموني
علموني نشوف و نسكت ما نفضح ما نورق
ما نكشف ما نبرق ما نفرش ما نعيق
ناخد حقي و نعلق
علموني كيف نكذب الكذبة و لها نصدق
و نلبس قناع و نتحامل و بالكيد نلفق
و نرد الحق باطل و الباطل حق
علموني
علموني حتى انا بغيت نكحش و نلعق
و ف كل موائد تلقاني نعوم ف المرق
ياك اللي سبقني عدّا و ما زلق
علموني حتى نا بغيت شمس حروفي تشرق
و صوات كلمتي ف سما المنابر تبرق
علموني و الله منكم ما نطلق
بقلم : يزيد علوي اسماعيلي
في 18★06★2020
تعليقات
إرسال تعليق