★ فين هي النحلة ★
محتاج نفرّ من وسط الكسدة * ما نبقى سجين
نطير بعيد فين نصيب الراحة * و لا لي جناح
ماتت الروح من حر النكدة * واقعنا حزين
و البدن تلاح مرمي ف الساحة * مطعون بجراح
القلب التكدى من صعد الكبدة * دقاتو تنين
و العقل تلاح في رحى دواحة * تتقادفو رياح
الوجَه صدى ما بقى غي جلدة * حاجب فوق عين
الزين تلاح ما بقات ملاحة * الكتف حين طاح
البدن غشا ★
عليه نا ما نخشى ★
لا تسالني علاش ★
العمر مشى ★
و الشباب راه رشا ★
ما عاد لو معاش ★
★★★★★
ما بقى لي جهد كيفني نتحدى * ما نطيح في كمين
لا لي فالكيد لا لي ف قباحة * و ما نبغي نباح
عقل قال صبر حتى تفوت الشدة * سبحانو عوين
و كلمة الحق تطفو وضّاحة * و يجي لها صباح
عييت نعد و الهم تعدى * رسماتو سنين
بلون فريد ريشتو مساحة * تبكي بلا نواح
دايز ليّام و الصبر تصدى * ما عاد لو رنين
لا لي مرعى و لالي ف فلاحة * زهري بلا لقاح
يلا السعد بطا ★
يحطك فورطة ★
كتْبة بلا نقاط ★
عقل يتسطا ★
و تطيح فغلطة ★
ما تلقى عواط ★
★★★★★
يا رحيق الورد كيف زرتِ الشهدة * بسلاسة و لين
بشكل عسل ريحتو فواحة * من ذاقو رتاح ؟
قال النحلة خداتني فالمعدة * و المعدة خزين
تحوّل شكلي بأسرار ف غُدّة * و نْزل في جباح
قُلت النحلة فين هي بعدا * نمشي لها لفين ؟
تكون ف صحرا اولا فالواحة * و لاّ في بطاح
نهزّ هدية و نمشي بالوعدة * و كلام فيه لين
ننظمو ميزان و كلام فصاحة * و قياسو مداح
كلام فخنشة ★
نرشّو بالكمشة ★
مشموم في عراش ★
زواقو نقشة ★
حَنّتو ما حرشة ★
ما يفهمو وباش ★
يزيد علوي اسماعيلي
تعليقات
إرسال تعليق