♡●●●●● قصة ما جرى ●●●●♡

♡●●●●● قصة ما جرى ●●●●♡ 

مَا انا الاّ بْشَر * دوَّخْني زِين كِقْمَر * 

ما صَبْتْ صْبَر يا سْيادي سَمْعُو نَحكِي ما جْرَى ●●●

سَلْبَتْني زِينْة الشّْفَر * بْخَصلَة نَزْلَتْ من الشْعَر *

لُونْها ذَهْبي و يَا سْيَادِي تَشْبَه خْيُوط الذْرِة ●●●

وردة ف قفطانها احمر * مطروز بالصقلي الحر *

تشرق تبرق يا سيادي * هاذي نجمة و لا مرا

مَا انا الاّ بْشَر * دوَّخْني زِين كِقْمَر * 

ما صَبْتْ صْبَر يا سْيادي سَمْعُو نَحكِي ما جْرَى

وْجَهْهَا يَشْرَق كِفْجَر * زِينَة من الرَّاس للِظّفَر *

عْلِيهَا لَوْقَار يا سْيادي تْبَان عْفِيفَة و طاهْرَة ●●●

رْشِيقَة و لُونْها سْمَر * عْسِيلة و عْلِيها السَّر *

نَعْشَق الشّهْد يا سْيادي نَخْلة بِبْلُوح ثَامْرِة●●●

مَا انا الاّ بْشَر * دوَّخْني زِين كِقْمَر * 

ما صَبْتْ صْبَر يا سْيادي سَمْعُو نَحكِي ما جْرَى

لَغْرام في قلبي حْفَر * صار صَايَكْنِي و كَيْجَرّ *

وَانَا مَجْرور يا سْيادي ناسي دُنْيا و لاَخْرَى ●●●

ما عُدْت نْغَضّ في بْصَر * و لَحْيَا من عِيني هْجَر *

طاير حاير يا سْيادي و حتى العيون طايرة ●●●

مَا انا الاّ بْشَر * دوَّخْني زِين كِقْمَر * 

ما صَبْتْ صْبَر يا سْيادي سَمْعُو نَحكِي ما جْرَى

سْهِيتْ و شِيطَاني حْضَر * صَرْتْ نَنْظر فِينْ مَا نْظَر *

و عِين يَبْلِيس يا سْيادي رَا تْعَرْفُوها فَاجْرة ●●●

عِينِي ما فَارْق لَخْصَر * ضَعْت و مِيزاني خْسَر *

و مِن حِين لْحِين يا سْيادي عِينِي تَرْحَل زَايْرَة ●●●

مَا انا الاّ بْشَر * دوَّخْني زِين كِقْمَر * 

ما صَبْتْ صْبَر يا سْيادي سَمْعُو نَحكِي ما جْرَى

رِيت الرُّكْبَة و النّْحَر * و رُمّان مَدْفُون فالصّْدَر *

رِيتْنِي مَتْلُوف يا سْيادي و طَحتْ طِيحَة وَاعرَة ●●●

رْسَمْت الضّحكة فالثّْغَر * و قُلْتْ نْسَالَك يا قْمَر *

لمّا لفَّتْ  يا سْيادي كْلَمْتِي صَبْحَت عَاكْرَة ●●●

مَا انا الاّ بْشَر * دوَّخْني زِين كِقْمَر * 

ما صَبْتْ صْبَر يا سْيادي سَمْعُو نَحكِي ما جْرَى

و كْلامِي مِنِّي نْفَر * والا حَرْف منُّو مَا ظْهَر  *

مات الحُوت يا سْيادي وصَارت الحِيرَة حايْرَة ●●●

صار وجهي بْلَحْيَا حْمَر * و قلبي بْهْيَامْها عْمَر *

لكن مَتْلوف يا سْيادي و على مَحْيايْ ظاهْرَة ●●●

مَا انا الاّ بْشَر * دوَّخْني زِين كِقْمَر * 

ما صَبْتْ صْبَر يا سْيادي سَمْعُو نَحكِي ما جْرَى

لحظة كأنّْها شْهَر * و الدَّق في قلبي كْثَر *

و هِيَ تَنْظَر يا سْيادي وَانَا حْروفِي مْسافْرَة ●●●

ما عْرَفْت نْكَرّ و لا نْفَرّ * و صَرْت نْفَكّر بِجْهَر *

خَرْجَت كَلْمات يا سْيادي ما عْرَفْتْها كِيف دَايْرَة ●●●

مَا انا الاّ بْشَر * دوَّخْني زِين كِقْمَر * 

ما صَبْتْ صْبَر يا سْيادي سَمْعُو نَحكِي ما جْرَى

قالت سرَّك ما عادْ سَرّ *و حُبّك بَان ما فِيه شَرّ *

يْلاَ تْرِيد تْقَابْل حْبابي هَانِي لِلْبِيت سَايْرَة ●●●

شْرِيت مْرَشَّة بالزّْهَر * سُكّر حْلِيب و تْمَر *

و رُحْتْ مْعاها يا سْيادي و هادي قصَّة ما جْرَى ●●●

يزيد علوي اسماعيلي