سالني سيد الشيخ ، بقافية و راوي
و شيخي من لشياخ عنايتو عناية
قال لي يا داخل للَّمسيد آش ناوي ؟
لاش حامل لَقلم و جاي بالدواية؟
*******
قلت لو يا شيخي لَعلوم جاي هاوي
رايد نكون مريد و طالب القراية
و من لِيس تعلَّم جبحو يظل خاوي
مــا روى من لَمتون و لا جْنى دْراية
*******
واش عارف حر الكلمة كيف كــاوي؟
واش داخل مولوع...و لا بالــغواية؟
واش عارف كيل الميزان آش ساوي؟
قالها ف الحضرة ... و كلامو معــايا
*******
قلت يا شيخ الوهبة ، يا سراج ضاوي
بغيت إسمي نجمة يضوي في سمايا
راه حرفي كـــــاشف و لِه لون ماوي
لا عيون تشوفو و ف حــالتو شفاية
*******
شار لي ف نشادو و معاي كان داوي
الحرف نغمة ف كلام و قياسو مرايا
را عديم الوهبة ك عود مــــا مساوي
مــا قالها ف گفاي ولا حكى وشاية
*******
مدّ حرفي يا شيخ ب شي دوا يداوي
يبْرا من علة و تعـــود لو مزايـــا
را قصيدي عايب و كلام ما مخاوي
بغيت منك دروس و زيدني وصاية
*******
قال لي قَوْل من قوال قايلو الراوي
و صاغْها في المثلة كأنها حجــاية
كيف ترسى لبراج على حيط هاوي؟
واش تسوى الـــقشور يلا بلا نواية؟
*******
قلت لو غير طلَب راني قوي و قاوي
نعطي مـال و جاه و جارية وفاية
غير حقق رجاي و خُود من الشهاوي
يلا تكون عويني و تهيب لي رعــاية
رايد الناس تراني كيف شي گناوي
هجهوجي ف يدي و نشـــادي غناية
نشايطي زهواني ، ف طباعي هواوي
نْريد شــاعر نكون و شهـادتي معايا
نطير بِين منــــــابر و حـالي متاوي
بْلَقب الدكتور و زجََّــــــال لي كناية
ما يضيم ف جنبي حوزي او شـاوي
ذا هو قصدي شيخي و ذي الغــــاية
*******
ما نصاحب جاهل مهما سخا و خاوي
و مـــا نرافق من را ف طريقو عمايا
ما يسـاوم لشيــاخ سوى ديب عـاوي
مـــا يْعِي بالَمعنى والا نْغام مـاية
الشيخ ما يبقى شيخ يلا خدا رشاوي
و لو لا شي للشيخ ما يرضى سعاية
الرشوة كيف هوا(ء) ما تملي شكاوي
و مَن دَرَّى ف الريح مــا لمّ لُو كفاية
طمّ ، زمّ لسانك يـا ذا سم شــاوي
و عطيني ب گفاك و حيد من حدايا
راه صوت الجاهل مهما علاه لاوي
علاجو بالعُكَّاز أو لا دوا عصـــاية
*******
يـــــاما من فقيه فتى فالــفتــــاوي
مــــــا سمع للحديث و لا صغـا لْآية
يلا خطب تتطــاير من فمّو رغـاوي
كأنو عفريت و ســـــاكن فالـــعباية
ما تفيدو رقية و لا بخور جـــاوي
و يلا بدا البداية مـا تصيب لو نهـاية
ذي قصة مْ خيـــال رواهـــــا علاوي
زِلْ منها لَالِف من وسطها وْقَــاية
و زِدْ يزيد مَن زاد يْزين في حكاوي
و سبحـانو ربي من زاد في عطـايا
رجايا ف المولى من جاد ب رجـاوي
يقيني شر الخلق و يكون لي حمـاية
*******
يزيد
تعليقات
إرسال تعليق