★ #حكاية ★
من شوقي و هوايا * ناسي السنين آش الذات
و بين نشوة و غواية * ســــاهي وسط اللذات
زاهي بين افراحي
بين هزلي و مزاحي
غارق في وسط مراحي
فاضي و راسي مرتاح
★★★★★★★
ما كنت سامع وصاية *و لا سلافي آش حكات
مشيت صايگ عمايا * نلاقي صفار الضحكات
كنت ساهي ما صاحي
بين جامي و قداحي
من مسايا لصباحي
شاعل جهلي مصباح
★★★★★★★
من الّلْهُو ما قلت كفاية *و راحت سنين و عدَّات
شبابي راح ورايا * و بانت فالراس شيبات
مشا لي ريش جناحي
ما لقيت فجوة ف رياحي
ضاع لي فج رواحي
و من راح جناحو طاح
★★★★★★★
من همي و شقايا * ما بقات روحي ف الدات
درت من هروب دوايا * و طريق همي عاد بدات
صايگ قرحي و جراحي
جرح ما يداويه صياحي
خانق دمعي و نواحي
ف قلب ما يحلّو مفتاح
★★★★★★★
لا هلال ضاوي ف سمايا * و لا نجوم ليلي شعلات
لا قمر ساهر معايا * و لا شموس فجري هلات
ظلام الليل وشاحي
بين ظلي و شباحي
في فياقي ما صاحي
و لا في سباتي مرتاح
يا السامع ندايا *
مني جِ خد وصاية*
و لا تسمع وشاية*
و تهد ما كان و فات
حياتي كيف مرايا *
ترى اللي راه ورايا *
اما النية و لب الغاية *
المراية عليه عمات
★★★★★★★
سباب همي ف حكاية * دال عين مع ثلاث مِيات
جابها لكم وصايا * نص جوج و جوج د عشرات
يا ذاك راوي القراية * جمّل في عداد الحسبات
و مَن غشيم لا ليه دراية * ينسى ما جا ف الختمات
#يزيد_العلوي_الاسماعيلي
تعليقات
إرسال تعليق