أمة الطيور ...
عمرها تبني عش ف لقفاص
ياك ف الشجرة تبني اعشاشها
شكون يعرف عيشة النسور
عينها عين القناص
من غير ضفارها تشيخ وتكون ساهلة ف ترياشها
والطاووس ياعيني يمشي مشية المغرور
والتاج فوق الراس
سبحان اللي ابدع الريشة منقوشة بٱنقاشها
وزهر الطير واخا يكون شحرور
الى ماصابو قرطاس
اكيد غادي ايصيبو ارشاشها
واللي ربى لحمام رجع مضرور
تسلل المش ملي غاب العساس
والناس تشوف شنو ادير مشاشها
والدار من غير لميمة هي قبور
تولي كيف لحباس
تبكيها العين والروح تسمع اخشاشها
يالساكن لقبور اش كاين تم من لخبور
كيف هو داك الاحساس
والموتى اعرفو هزة اللي حملو انعاشها
قولي يااااداك المغبور
الله احد الباس
كنتي طبيب لمدينة رجعتي من حشاشها
ياما شفتي وياما سمعتي معيور
كاين شحال من ناس
زكى نفسو فالاخر رجع من غشاشها
ياللي راك تحلم بالجنة والحور
كولشي بميزان وقياس
حتى توب الموتى اعبرو ف قماشها
والزينة وجهها زين لاش الغرور
واخا يضوي كيف الالماس
تحارب التجاعيد وعنقها غطاتو بشاشها
والعاشق باغي لحلال معضور
من نهار شافها مقادة ف لباس
تنشر غسيلها وتنفض ف كواشها
ولحلال يبغي الجري واحزم سيور
والعشرة الطويلة تبغي التسياس
ماشي ديما تهجر فراشها
يالباني على كتاف الدراوش قصور
وديما خايف من الافلاس
المال لحرام ياعمي ديما متقوب خناشها
مازال باقي ناس شي جار شي مجرور
شي واكل شي مصارنو تقطعو بلمقاص
ناس مرتاحة وناس طالبة غير معاشها
بقلم حسناء العجوري
تعليقات
إرسال تعليق