« من الحبة قبة »
محاولة مرتجلة ، تخللتها بعض الحوارات من نسج الخيال
و هي قريبة من قياس « يا الرايح فين مسافر تروح تعيا و تولي »
★★★★★
يـا الطامع ف غرام الغِيد و راح رايم لَمْحبّة
راه لازم صبّــار تكون ، الرِّيم طريقو صعبة
اليوم نحكي قصة الغرام ، يوم عشَقْتْ الشهبة
سلبني بْنجالو الغزال ، و رحت داخل ف اللعبة
كان غزالي كيف هلال ف سماه بدلال تربّى
و حبّي ف قْلِيبِي مدفون بين لَحزان تخبّى
تردّدْت ، تْسنيت ، زْعَمْت حين حانت الوجبة
قلت لها يا زينة لريام ، جيت طالب الصحبة
كـان قلبي يدق و ينبض ، قـايمة فيه الجٌَدبة
مخالطة فيه فرحة بالخوف و حب و كذاك الرهبة
لفّت لعندي بغناج و رٍيت ف العيون الرغبة
و باللسان المعسول - حبيبتي - قـالت : مرحبا
عشنا فالتاويل سنين كما غْطا تحضن علبة
لحين دخل الشك حياتنا .... فتح بـــاب الكربة
حبيبتي مغيــــارة تنسج برج قبة من حبة
من لا شي تخلق جدال ، و عِيدنا يصبح نكبة
قلت : يا زين الريم الشك فخ و شراك و نشبة
من طاح ف شرّو ، بِيتُو خلا و يتحوّل خربة
قالت : علاش تخون و شكون راك تمدح ف الكتبة
ديما شــاد القنت ، و سْبَق قُلتْها قَبْل الخطبة
قُلت : يـــا نور هنـايـا يا هلال من قـــاد السّربة
الحرف غير هواية و سبحــانه وهّـــاب الوهبة
جَرِيدة زهرة راها اليوم فتحــــــات الرحبة
و خديت قلامي - يا حبيبتي - و دْخُلتْ الحلبة
لا تسيئي ظنك و بالجور تحكمي بــــالزربة
راه بالشك نحس كما الطعن ف ظهري بالحربة
لا تديري كمـــا قالو اليوم « حبة من قبة »
يكون عقلك رزين ، و ما يجيب لخصام السَّبة
عاونيني ببسام الغيد ، و زيحي عقاد النصبة
اليوم صادي كتّاب شداد ، و را المبارة صعبة
نوصيك يا ســــاكن قلبي ، يا وريدة فالرحبة
لا تطفي شمعة لَوْناس ، و يخبال خيط الكبّة
كوني لي سند ، عوين ، و لا تكوني لي عقبة
أما الشك راه ما له دوا ، و حــــارو فيه الطبّة
★★★★★★★★
ب ✏️: « يزيد العلوي الإسماعيلي »
في. : « 30 * 12 * 2020 »
طنجة - المملكة المغربية
★★★★★★★
شرح بعض المفردات لاخواننا من خارج المغرب لنقربهم من لهجتنا العامية المغربية
★★★★★★★
رايم = من رام يروم اي اراده و اتجه اليه
الريم = الغزال
الشهبة = الشقراء
لنجال = العيون او الرماق
لريام = ج ريم
غناج = غنج و دلال
التاويل = وفاق و تفاهم
الكربة = كرب و هم و غم
نشبة = فخ و مصيدة
خربة = دار مهجورة
الكتبة = الكتابة و المقصود هنا القصيدة
القنت = الركن او الزاوية
السربة = سرب او جماعة و غالبا تطلق على
الطير و الخيل
الزربة = السرعة
السبة = السبب او الدريعة
ببسام = ببسمات و ضحكات
الغيد = الحسناوات و الجميلات
النصبة = اداة للصيد كما الفخ مثلا
صادي = امامي او بمواجهتي
لوناس = الأنس و المؤانسة
الطبة = الأطباء
تعليقات
إرسال تعليق