وهم الصحبة
خسارتي عاد فقت من الݣلبة
ضيعت ف لخوى سوايع لعمر
لݣيتني عايش ف أكبر كذبة
و شربت لمرار من كاس لغدر
فقت معطل من وهم الصحبة
وهم سرقني جناحو من الصغر
من حر الشمتة ملكاتني الجذبة
جمر لغبينة ف دواخلي سعر
كان عندي عزيز نبغيه محبة
لݣيتو من حوض طيبتي يمخر
يلݣاني جنبو فظروفو الصعبة
نوݣف و نطيح ف جلايلي نعثر
نجري و نجاري ما نبخل بسبة
نصون عيوبو نسامح ؤ نغفر
لݣيتني نزرع الورد ف خربة
نسقي جذورو من حوض الصبر
دارني طعم ل طماعو نشبة
كال حتى شبع و عطاني بالظهر
حرايمي مݣطر يتقن اللعبة
بقناع النيفاق خنشوشو مغنبر
كان ناوي ؤ يتسنى الوجبة
ݣليبو خبيث و لوجه مقزدر
ف صهد ليام خلاني و تخبى
خلاني وحداني نعاني و غبر
ع.خ 22/09/2020
تعليقات
إرسال تعليق