علاش نعيش على الناس عالة
مانا شي ذليل ولا بارد الكتاف
ولا أنا كسلان ؤ عيفة الرجالة
ولا أنا مخنث من ظلي نخاف
ولا مافيا رحمة ؤ غير بنادم آلة
ولا مغتاب ولا نمام ولا حلاف
ولا كلب نتمسح نحرك الذيالة
ؤالكتاب ماشي بأناقة الغلاف
شارب كاس تمارة حتى لتمالة
أنالي دا ؤجاب ؤجرب ؤشاف
بحري نعرف فين نلوح الثقالة
ؤقاري نفرق بين الفاء والقاف
لي حاسبني على عيني الجلالة
يمكن شوفو لي نقص ؤقصاف
ولد الخير ماشي تريكة الزبالة
نسول فناسي ؤ نكرم الضياف
داخل سوقي ؤ ما ندير بلبالة
إلى خسرت حاجة ربي خلاف
نضحك ؤ نلعب من غير بسالة
مع الصحاب فالمنارة الظراف
★حسن صبي★
تعليقات
إرسال تعليق