# قصيدة بعنوان "الطير" نظم الراجي عفو ربه
.........................
الحربة
اعزملي يامرسول شور طيري شارق لنوار
مالي صبرا لله سير عازم و آجي بخبارو
وحكيلي ماصار
.......
القسم 1.
.......
آيا سدي - من يوم غاب ضي هلالي نور البصار
والكي زاد كيو لفراق
الحال ما حلا ليه مساق
رجاي فالكريم العتاق
يزول حر لشواق * دما لصفاق * حق تحقاق
نرجا جود الكريم يرجعلي مرسولي سريع ويوافيني
بخبارو
تبردلي لصيار
......
القسم 2.
......
أياسدي - لقليب من فراقو دايق حر الجمار
نرجا الله نعم المجيب
يعودلي و يشفا لقليب
الحال مايداويه طبيب
البرد فيه و لهيب* و سر عجيب * واعر صعيب .
عسى من كان بالمحبة حالو هيمان من بها د الباهي وسرارو
ماعاشق فبكار
........
القسم 3.
........
أيا سدي - وانا مع البهي مفارق وين الفرار
لا فرح لا مراحة نسطاب
الشوق هاض ورسلت كتاب
يلا نصيب نظفر بجواب
نسيت حس لطراب * فظل غياب * نور لهداب.
مشى و بطا وغاب عني طول لغياب ياكما ضل طريق مسارو
خلاني محتار
........
القسم 4.
........
أيا سدي - كنا وكان بيه المرسم طيب و زهار
العز كان ليه مع الشان
يلا تسال جبحو مليان
حريص للعدا ما يليان
حكيم كان ربان * مسك لعنان * عل اليتقان .
هجر لمكان تركني مكوي من نارو بكرحتي ربي يفدي تارو
ونعودو لدار
......
القسم 5.
......
أياسدي - كانت دارنا فالحومة هي الشوار
فيها العلم كيتباها
شهوة غراضها ونزاها.
وشكال حيرات نباها
شفنا ليوم راها * صبحت عاها * على التفاها.
لولا ما ساسها امّكن باقي متقون شامخة فالتاريخ صوارو .
محصنها ينهار
......
القسم 6.
......
أيا سدي - من بعد كنت ساهي متلخبط فالفكار
حس الخيال ليا بشر
ورفعت بالمهالة لبصر
فقبالتي رسولي نجبر
شحيب كان وصفر * كيتحسر * زاد و عتر .
سلمت عليه قلتلو زيد رتاح و عيدلي حوال وليفي و خبارو
لا تكتم لسرار
.......
القسم 7 .
.......
أيا سدي - من بعد ما رتاح تلفت ليا وشار
محتار قالي فالمبدا
ندري هوى قليبك عدا
متعوب داق حر الكبدا
لكن بعد شدا * ولا بدا * تجي الرغدا
انطقت وقلت يارسولي يكفاك خلاص لا تزيد القلبي فضرارو
ناولني لخبار
.....
جاوبني مرسولي وقال يا صاح سمع لخبار
لا تقطعني بحديت صيغ قولي وافي بعبارو
نسجوه الشطار
......
فكتابو وصاني و قال عيد كلامي بجهار
ليك صغالو و للي رتاو و شكاو على تهجارو
من جملة لحرار
......
من بعد العز و غاية العناية في قلب الدار
و كان الشان وكان صرحنا نخوة للي زارو
من نورو ستنار
.....
عشنا فاللم وناسة الفهم و الحسم فالقرار
و زهو موروت جدادنا و لملاحة وسط بحارو
وجنينا لدرار
.....
كنا بالطرقة راضيين قايدنا م لحبار
يفتي ع لقواعد ما يحرف لقصيد مسارو
وحنا ليه انصار
....
آ بن سدي و اليوم راه بانو نخبات كتار
دخلو خربو فمراحنا و كلا مجد صرارو
حارتلي لفكار
.....
سلبونا بالبشرة تمكنو و بداو التكشار
فوجه عاشق موروتنا يضغطو يسرع بفرارو
ما يعباو بعار
......
قالو رادو يتقدمو و ركبو درب التوخار
والشامخ كيشكي على زمانو فين الي غارو
ينهيو المنكار
.....
رفعو شان الغري و باركولو فنعيق القار
و ينسبو حب الغاز لنخل يحسابوه تمارو
بعمية بصار
.....
لجنات تحقق فالكلام و المتشرق عيار
يدعيو بعلم الا دراولو تحقيق لتفسارو
كالجاب ولسفار
......
شي نقابة تحت النقاب كن دياب فالوعار
من سار فمسعاهم دارهم رجالو دكارو
لاحوه اللقفار
......
وانايا حلي بينهم شفتو زايد تكدار
ما نرضى بالشمتة يبخسو قدري من مقدارو
شاكي للقهار
.....
هو مول القدرة غني وافي نعم الستار
طالب منو موروتنا يفاجي همو و كدارو
حاطو بيه ضرار
......
حتى لين آوعدي سكاتكم آ لامت لحرار
يكفى تركو لهجو فبعضنا راه كشف دينارو
و تسبب فالعار
.....
الواراتة متنازعين شاغلهم المعيار
و الخماسة فالورت كيحصدو زرعو و تمارو
هلو لتشمار
......
هدا ما قال الطير يالي سايل عل لطيار
ربي يفجي لضرار ما رقى علم سوى بكبارو
يا ؤولي لبصار
......
خود آراوي هاد السلام طيبو فايح بزهار
مهدي لشياخ زمانا و ربي يرحم من سارو
م لامة لحبار
.....
أسم النساج آ عاشق اللغا فنهايت لشطار
مصطفى و اخليفي كنيتو يغفر ليه وزارو
لجليل الغفار
.....
وصلاة الله على شفيعنا لحبيب المختار
وعل العشرة لصحاب و السباط و آلو و نصارو
و زواجو لبرار
-تمت-
الاستاذ مصطفى اخليفي
تعليقات
إرسال تعليق