««« نَـــادَه لَـــكساد »»»
مالك خويا صــــــايگ لَنْكاد ؟
و بْدَمْ الدَّم عيونْك حمـــــارو
حــامل الغلّ و ف القلب حقاد
و احكام الزور و بهوت كثارو
نكرتي تـــــاريخ و تربة لبلاد
و ما ضم كتاب و جا ف اخبارو
****
و سكن الكذوب لسان القادة
من بعد صبح ف التابع عادة
مــا دا من دين و لا ف عبادة
ما جا ب نفع ولا ب يفادة
★★★★★★★★
مَـــالَك خويا نَـــادَهْ لَـكساد ؟
بحبال جْمـــار و الشّر شْرارو
لابس بَرنِيط و تمضي ب فساد
ف ريع و تبدير و بيارك بارو
مفرّش هَمْجِي و مُحتلّ وْساد
و الداخل فرّان تحرقو نـــارو
****
من خـان وصال و بنى لَحدادة
راه ضاع و تاه ما صايب جادة
و خُبري و غشيم خـاد ريادة
و مركب ركبو بلا قيّـــــــادة
★★★★★★★★
و قـــاد المركب كمشة حُسّاد
و صار الحاسد يحسد جـارو
جارو ملهي ف زرعو و حصاد
و الحاسد ملهي ف آشنو دارو
جـارو يجري بجهد و جهــاد
و الحاسد محسور ناسي دارو
****
و جفّو لبيـار و خوَاو بيـــادة
و تسالى صيف و رقص جرادة
رينا الحليب مـــا لحقو هذا
و سعــار الموز زاد زيادة
★★★★★★★★
لو كــان لَبلاد حكموه رشــاد
لَكان اليوم نجح ف مســـارو
يــاك المولى من خيرو جــاد
ببترول و غاز ، شجر و ثمارو
لكن الخير الـــــدّاه الـــــواد
و الواد نشف و طلّ حجـــارو
و عــاد العوّاد من دون عواد
خـــايب و خيبتو ف دبـــــارو
****
قلبي على خويا اللي منقــاد
قادو ثورة و الجند دصــارو
جــابو رئيس ما رْأَس مــا قاد
و ما قَدّْ يشير حتى ب ظفــارو
بحال مَن سبقو كــــما المعتاد
يسمع و يطيع و يْرى بشفارو
قالو : العسكر ف الحكم عمــاد
و يلا صاح الثور خاب خوارو
هــــــاذي قصة بدموع مداد
كتبها - يــزيــد - دون شوارو
طــالبين الله يهدي لَــــعباد
و تسمع لَبــلاد لغا ثــوارو
يبـــــانو روّاد بأفكار جداد
و يرأس رئيس الشعب اختارو
#يزيد_العلوي_الإسماعيلي
تعليقات
إرسال تعليق