★★ما كان هذا ف حسابي ★★
النار گادية ف جنابي ،
و الغيث ما طفاه
ما رق لي قلب احبابي ،
مـــــا سمعو ال آه
العين باكية مطفية ،
و الدات بلا دوا مرخية
الفراق راه زاد رزيّة ،
و الصَّبر فين راه ؟؟
★★★★★★
وااااااه يا مكتابي ،
و القلب مــــا گواه
ما كان هذا ف حسابي ،
و لا العِــيـــن راه
الصاحب ما يطلّ عليّا ،
ظهرو عطا و سامح فيا
ما سال ما رسل برِية ،
والا بفــــاه فـــــــــاه !!
★★★★★★
رااااح ضِيّ شبـــابي ،
و الشيب جــا وراه
شلا عراض دقت بابي
و علّة مجــــــــاوراه
ما لي يلا قلم ف يديّا
و حروف ساهية منسية
تبقى ورا الموت هدية
لِمن جـــــــــــــا قراه
★★★★★★
واااااه يـــا عَجـــــــابي ،
زهري عطا گفــــــــاه
ما عاد لي صبر ف عصابي
و الهمّ مـــــا كفــــــاه
الكيّــــة تنگي كيّــــة
لَقليب مــا ارتـــاح شوية
كلمات عـــاللسـان عصية
مـــــا فـــــــاتو شفـــــاه
★★★★★★
عكّـــاز ما هزّ ركابي ،
و الشيب ما طاق عگابي
و من كانو روابي * صارو كُديات * ما يطيقو عاثر ف خطاه
الهمّ مـــا كفّ كفـــــاية ،
جاني شْرَك قلب معايا
بَلعاني نكــاية * تــارك ندبات * يبوح سرو و يلوح غطاه
صابر ما رضيت نحـابي ،
و لا ندير يْدي ف خوابي
و خفافو جيابي * بار الشيكات * بعد ما ضاع المال و جاه
من طاح راه صار نفاية ،
و بين قران بات شفاية
لا عز لا عناية * كأنو مات * تلاح ف قبر من دون غوات
★★★★★★
راااه بـــــــان غرابي ،
ينعق في سمــــــــاه
ناوي يزورني ف ترابي
و يســـــــال فين راه
شلاّ هموم همّت بيّا ،
عـــالقلب دايرين حمية
و الحيّة بســـــــوء نيّة
زادت ف شقـــــــــاه
الكلام ذا ما هو فيّا ،
ما فيه ما كان عليّا
يَزيد صايگاه قْفية ،
و ذا مــــا عطا الله
جنّ الحرف راه بْليَّة ،
ما دْرِيتْ جنّ ولا جنيّة
لجواب لْدا ذو لَــخفيّة
وَحدو في عــــــــــــلاه
طلبو الله يغفر ليّا
يلا فاه فِي بالمعصية
و سيد النبي يشفع فيّا
و نكون في حمـــــــاه
#يزيد_العلوي_الإسماعيلي
تعليقات
إرسال تعليق