. ★★★الزين الفتان★★★
حطِيني بين لَجْفَان .... أيا الزين الفتان
العفة و الايمان ..... زِينك هبة... رباني
فهواك راني مفتون ... و حب الرِّيم بْلاني
**★**★★★***★**
واش ما فْعلمك يا لَايَم ..راني عشيق وَّلْهان
وحبي لك من زمان .. من وانا صغير نْعاني
قصتي على كل لسان... و ف عينيك بَرَّاني
***
لالة يا بنت لكرام ... يا عروسة بين الحسان
دَان بين الكيسان ... بْهَا و بياضك مرجاني
صدر ملقح رمان .... أجي نَبْتِي ف حْضاني
***
يا السالب لبي و عقل ...حنِّي حْتَانا انسان
نسقيك حب و حنان .... ونحقق لك اماني
نسعد نْوَلِّي فرحان .... و ندفن كل حزاني
***
الله وحدو اللي يْعلم ...من صباي وَانَا فنان
قلام ديما ف بْنان ... مَحْياك ديما ف لواني
والعشق والحب يبان... و عليك كان رهاني
**★**★★★**★**
يا حاكم فصل و حكم ..را الحب عليا سلطان
معيشني في لمحان ... و الشوق راه عماني
مَكْسِي وانا عريان ...و رجعت شفاية زماني
***
لله يا زينة لَقْوام .... لالة اميرة بالتيجان
جاه و صولجان ...و عرشها غرسة ف جناني
قصرك مالو حيطان ... بَانِيه - انا ف فْناني
***
خدود حمر ياقوت.. و جفان بلا كحل غزلان
عطرك ِريحْتو ريحان...غير بالنسمة غواني
خلاني فاهي سكران ... ما نبرح من مكاني
***
لله نظري للحال ... و سمّْعيني الصوت الرنان
كتبي لي ولو خطان .... يحركوا وجداني
قودي كوني ربان ... قابلك قبطان سْفُوني
**★**★★★**★**
لا تسمعي كلام المغيار .. راه نمام و زنان
يَّامو كلها بهتان .... عاش حياتو أناني
فاقد كل اتزان .... فعلو باين شيطاني
***
قبلي لالة و رضي ... نجيك راكب حصان
فارس من الفرسان...لابس قميص عثماني
نتباهى بين الخلان ... و نقول الزين بغاني
***
جوج جوج انا نهديك...شربيل بطرز القفطان
صندال بلون الفستان...و نحملها ف صواني
نوار و بلعمان. .... ربي برضاه حباني
***
الصداق الف مثقال... ونجيب كباش و تيران
نعرض على جِّيران ... البعيد فيهم و الداني
و الله المستعان .... نزيد و عيني ميزاني
**★**★★★**★**
و نقول لكل من سال ... علوي ما هو مَنَّان
كل يوم يزيد اتقان... حرفو ما هو فاني
اسماعيلي يا لخوان ... الله الكريم رعاني
***
خلوقي مدينة فاس .... القصبة ف واد ويلان
طنجة فيها لسكان .... و كل ناسها عرفوني
بلادي كلها أمان ..... كِيَّة اللي لاموني
**★**★★★**★**
نختم بالرحيم الرحمان خالق جميع الأكوان
هو الكريم المنان ... جاد بجودو و عطاني
و الخير عليا بان .. و وفّا لي في ميزاني
***
والصلاة على نبينا .... رسول انس و جان
هو من جا بالقرآن.... سيد النبي العدنانِِ
عطاه الله البرهان .... و الحكمة و ِ البيانِ
★★★
تمت بحول لله و حمده
في 29*11*2017
يزيد علوي اسماعيلي
تعليقات
إرسال تعليق