★★★ كان قلبي ... ★★★
من يسعد ف الحب
تراه كيف سلطان اصحابو
و من ف الحب تعب
شلا دموع تسكن اهدابو
لي قصة ف القلب
و كل من سمعوها شـــــابو
صبية صابت صب
لحين شاب في عز شبابو
مــــــــــا يفهم ف الحب سوى اللي يحبّ
ذاك مَن عينو دمعت وبْكا مع الـــقلب
اللي يحب تسمع صوت جراحو يلا نْحب
و اللي كتب و مـــــا هزك ريحو ، ذا كذب
★★ ★ ★★
كــــان قلبي شلال ف ريم كيصب
و كل نقطة تجري و تقول : كنحب
كان فيض عبـــاب غرامو يساع شعب
يحيا القلب الفــــاني لَوْ منّو شرب
كــــــان قلبي دافي و صفا من الدهب
يحيي تَـــلّ البور يلا سقى و كبّ
لو لَقلوب دلو قلبي كـــــــــان جبّ
مــــا ينضب من ماه مهما روى و عبّ
كـــان قلبي بنســـــام عطور كيهب
يداوي من دار النِّـيَّة و جا(ء) قْرَب
يـــامـــا لْكل جراح كـــان دوا رطب
كــــان بلسم لكل من لا جداه طب
★★ ★ ★★
و حين راح و مشى لَوفى ،
و الصفا وفى و استخفى
قلبي تصاب بسخفة ، و عقيلي تلف
داي ما جداتو وصفة
گفى ما ف كف الكفة ،
و كيف نار قلبو تطفى ،من جرحو نزف
كيف يرجع للصّف من في بْلَا(ء)رسب؟
كِ يدير يمسح ذنبو مَن قلبي غصب؟
مــــــــا نآمن خنجر في قلبي ندب
و مــــا نتيق جوار من بِــــقلبي لعب
كيف ينبض بالحب من قلبو غضب ؟
كيف نَنْدي بحلاوة و جبحي نضب؟
ريت شلا علاّت و فيّ الـدّا(ء) نصب
طانسيو و السكر و عطــاب في عصب
اليوم لا حب ف قلبي كلشي هرب
لحين بـانت الصلعة و ما بقي لي زغب
صرت كيف جريدة قحلة بلا رطب
يـــــــــابسة منسية ، عرجونها شطب
#يزيد_العلوي_الإسماعيلي
تعليقات
إرسال تعليق