★★★ الرّقّاص ★★★
حين كان مْكـال الكيّال يكِيل مزيان
كان رقَّاص الميزان بالتّمام شــــاهد ★
اليوم الرقّاص عواج و مال ، بان عيّان
ما بقى كيف علام ، مْيَال ، صار قاعد ★
كان وافي صافي ما خافي عالَعيان
اليوم يشكي هزال صروفو بلا قواعد ★
حين طلْقوه كرام شدّوه بعض غلمان
تلاعبو ف مكالو ، مـــــا صانو العاهد ★
قلّصو ف صروف الميزان هْوَاوْ نقصان
مـا قسطو ف عبار و السعر صار زايد ★
طمسو القناعة و الطمع بــان سلطان
و من لا جداه لْقِيم اللّحيس باش فايد؟★
فاش فايد من هو طماع ، فاش فايد ؟
آش فادو رتق و ترقاع ، دون عـايد ؟
فين زايد من لا مقنــاع ، فين زايد ؟
آش زادو جوع الجياع ، بالـــزّوايد؟
★★★★★★★★
رقّــاص و قاسو الهبال ، و زاد خسران
مــــــا فْهَمْنا فعلو لا آش رَاه رايد ★
دار وجهو ف گفاه ، و ما تراه حشمان ؟
كيف يحشم ؟ مَن لو غشمان لو تساند ★
مــــــا كفّ من كفّو ب هجا يراع زعفان
مــا عفّ الريشة وَالَا قصى قصايد ★
مــــــا يْهَمُّو فحوى والا بحور و بيان
مـــــا تْهَمُّو سكّة ، ماشي بلا روايد ★
ينطّ و يحطّ الخط ف شط عين عميان
عميان بصاير ، لبّسوه ثوب ناقد ★
و من ندّد و دان ، ب دون ذنب يندان
و من أوّل كلمة يلقى الرد واجد ★
كيف ناقد صوتو يتباع ، و ما محايد ؟
بــاع نقدو بحال البيّاع ، ف سوق بايد
قال قايد !! و حرق لِابْداع ، بــالشّواهد
واش قادو لسوق الصنّاع ، بكِير زاند؟
★★★★★★★★
كيف ينقد جاهل غافل غشيم عيٌان ؟
لا هو قرين فهام و لا من النّدايد ★
مــا تراه قرا ف الديوان سوى العنوان
و حين يمسك لَقلم آرى ما يعاود ★
حين يكتب أسمو يبصم ب آل فهمان
و من يقرا نقدو ، ينقاس بالغدايد ★
حاسب شعر و نثر سوى سطور سيّان
ما روى ف الراوي والا قياس فاسد ★
لو تْريد تنصحو ، وجهو يطل زعفـان
ف عينيه شرارة و يعضّ بالنواجد ★
مـــا بقيت نقربو و لا نقيم ف مكان
فيه هاذ الناقد لا يقول عليه حاقد ★
و لو يقول: الآن هلال ف الضحى بان
ما نقول : كذبتي ، حتى لا يقول حاسد ★
دابا كيف الامس يروح ف طي نسيان
مثلو ما يقوى يبقى كثير صامد ★
★★★★★★★★
#يزيد_العلوي_الإسماعيلي
تعليقات
إرسال تعليق