رِيتْ البَاطَل دَلَّى سْوَالْفُو
و فُجَّــار فْ بَابُو تْصَافُّو
بخْنَــاشْ وْ لَــگْفَــافْ
هَذَا مَجْهَول لاَ حَدّْ عَارفُو
وْ ذَا مَجْلِي لا عِين صَادْفُو
وْ ذَا بَـايَن خطَّـاف
أهْل الشَّر صُدْفَة تْصَادْفُو
هْوَاوْ البَاطَل ، بِه وَالْفُو
و تْخَطُّو لَــعرَاف
فِي جنْح الْعَتْمَة تْعَـارفُو
علَى زٌور و كذْبَة تْحَـالْفُو
ذا عَاهَد لَجْلَاف
و طَلّ البَاطَل عَارِي بْلَا لْحَافْ ★ مَا غَطَّى لاَ سَاقْ لَا كْتَافْ ★ مَا حْشَمْ وَ لاَ خَافْ
طُوقْ البَاطَل عَرَّى صْدَايْفُو
صَدْرُو طَلّ وْ الكُلّ شَـــايْفُو
وَ مَا دَرَّق لَرْدَافْ
البَاطَل جَـا و جَابْ مْعَارفُو
شِي بالشُوكَة شِي مْغَــارفُو
مْنَ قْبَـايَلْ وَ طيَافْ
فِي زَرْع الفَتْنَة احـْتَــــارْفُو
شَعـْلُو نَــار حـْرُوبْ مَا طـْفُو
مَا طَلْبُو لَسْعَـافْ
كَذْبَة وْرَا(ء) كَذْبَة وْلاَ كْفُو
مَـا جَنْحُو تُـوبَة وْلَا عـْـفُو
الشَّكْوى لْمُولْ لْطَافْ
وْ لَمَّا الحَقّ عَرَّى على لَكْتَاف ★ وْ عطَاهُم طرَايْح بَالصّْنَاف ★ الشَّر بْدَا نَفٔنَاف
و البـَــاطَل دَلَّى شْنَايْفُو
مَنْ غَضْبَة طَاحُو قْنَانْفُو
و بِمْقَالو دَرَّاف
شَدّ فْ شَعْرُو و صَار نَاتْفُو
غَاضَب مَن حَقّ جَاهْ قَادْفُو
و رْمَاه فْ الَفْيَاف
كُلّ مَنْ شَافُو قَالْ لُو : تْفُو
وْ كُلّ مَن عَرْفُو عَادْ عَادْفُو
مَا بْقُو غِي لَكْرَافْ
غَدَّا يَبْزَل مَـــا كَــانْ عَالْفُو
يْخَلَّص مَا جَا فِي خْرَايْفُو
و مسْتُور يْنَكْشَاف
البَاطَل رَاهْ مَهْمَا سْرَى و طَافْ ★ الْحَقّ يْرَكْبُو نْهَايْة الَمْطَاف ★ وْ يفُوزُو لَشْرَافْ
غِير سِر بالنِّيَّة و لا تْخَاف ★ مَا يْغَلْبَك بَاطَل لَوْ حَاف ★ كْفَافْ الكِيدْ خْفَافْ
رِيتْ الرَّايَس قَايْدُو الشَّاف ★ الحَاكَم شَافْ وْ رَايَس عَـالْطـْرَاف ★ ذَا حِلْفْ الشَّرَّاف
عَسْكَر قُجّ ف شَعْبُو لْحِينْ جَافْ ★ مَا وَقَّر جُورَة وْ لا ضْيَاف ★ و يَرعَى ف الحَتْرَاف
نْسَالُو رَبِّي صَاحَب اللَّطَاف ★ يْعِينْ اهْلَ الحِرَاك الظَْرَاف ★ و يْحَلُّو نَاس لْطَاف
يزيد العلوي الإسماعيلي
تعليقات
إرسال تعليق