★★الكريم و البدرة ★★
الكريم كان حامل بدرة *
في فْلا(ة) مشى خبَّاها
فالأرض حْفَر لِها حفرة *
و دار من تراب غطاها
★★★
الكريم راح دار العمرة *
و مكة للروح دواها
مقام النبي زين النظرة *
يْلا زارتو النفس شْفاها
★★★
الريح جا عجاج و غبرة *
و كل حفار غشاها
تخالط رمل و حَجرة *
و ربي لَو راد دحاها
★★★
الكريم عاد راح الحفرة *
و بدرة مرادو يلقاها
نسى مكانها بالمرة *
و سْهى فين كان رمايا
★★★
الكريم قال و بلا حسرة * :
« راضي باللي الله بغاها»
اليوم عسر غدا يسرا *
سعدات من زاد نباهة
★★★
ربي كريم مول القدرة *
ساق غِيمة ف سماها
و ف الفلا(ة) طاحت مطرة *
و اراضي البُور رواها
★★★
نزلَت في الحفرة قطرة *
البدرة لقّْحت نواها
طلَّت عَرش كبرت شجرة *
سبحانو من سواها
★★★
الكريم نال ظل و ثمرة *
نْعم ب طِيبها و جْناها
فاكهة و ريحة عطرة
ما حلى زينها و بهاها
★★★
ذي قصة و فيها عبرة *
لمن صغى و اسمع لغاها
من دار خير و لَوْ شعرة *
يوم الحزَّة يلقاها
★★★
#يزيد_العلوي_الإسماعيلي
تعليقات
إرسال تعليق