اصغَ لَمْعان يا السَّامع * و نَقِّي حَبّ الگاعة
و ايَّاك تْكُون غِير تابع *أَو تغْوِيك اشاعة
خَلِّي عقلك لك رادع * و لا تْشَغْلُو بوْضاعَة
و طريق الخير سِر سارع * غدّا يْكُون شْفاعَة
هَزّ المشعل و كُن رافع *علام همُة بشْجاعة
و كلام السُّوء لا تقارع * لا تْدِيرو شَمَّاعة
الحرف يْلا من قلب نابع * شاع من دون يْداعة
و يْلا غِير من اللسان طالع *ما يَبْرَح القاعة
※※※※※※※
يا من هو فالحروف طامع * الحرف ما هُوش بْضاعة
الحروف كنوز في مْراجع* ماشي فْ سوق الباعة
الگُوَّال علا يْلا تواضع * مْقامو ما يتْداعى
اما من بالْهتوف طالع * كْلامو يْموت ف ساعة
تحلَّى بالصَّبر لا تْصارع * الحرف يْجي بوْلاعة
و لو يْتَعبَك بالسّوايع * نْهايْتو يْجي بقْناعة
و حين يْجِي يْجِي مْبايَع * بِ وْزَان الصَّنَّاعة
و الحرف الزين ما يْطاوع * الا ذو لَنْجاعة
※※※※※※※
اللسان الزين قُومْ جامع * ما يفرَّق جْماعة
و القول يْلا كان نافع * زاد ايمان و طاعة
من باع الحرف بات ضايع * في اعتاب المطبعة
مهما يكسب يظل جايع * و ذاك حال الطمَّاعة
راضع لَغْيَال باش شابع؟ * وباش فادت رضاعة؟
و الدَّا ف عضاه راه ضالع * كأنّو عاش مْجاعة
ذا هُوَ حال حرف دايع *في مْناقب لَخناعة
ف وْجاع يظل كَيْنازع * لا لِعلَالُو مْناعة
※※※※※※※
نوصيك أصاح كُن ماتع * بالقْواف اللَّماعة
و لُبّ المعنى يكون ناصع *ما يحيَّر سَمَّاعة
من القلب احكي آش واقع * من وَسْط المعماعة
و للطُّعمة لا تكون راكع * و لا تفرَّط ف قْناعة
لا تَتْبَع لا تكون خانع * لا تجَرَّك خٔلاعة
من قلم هْجين او صايع *حطّ نفسو فزٌَاعة
خَلِّي نَظْمك لِه طابع * و لا تْرُوم التّبّاعة
حلَم و أْمَل و كُن بارع *اصل لَفْرَاشْ يْراعة
الكلام يلا من قلب نابع * يْلَم عليه رباعة
اما يلا غِي لْغُو و مايع * راح كما الفقَاعة
و اصغ لمعان يا السامع *و نقّي حَب الگاعة
و اياك تكون غير تابع * او تغويك اشاعة
※※※※※※※
بقلم 🖊: يزيد العلوي الاسماعيلي
تعليقات
إرسال تعليق