★★ قسم 1★★
ما بقى شي يتگال يا السمرة الحروف ذبالو★
و ألحاني تلفت زاد كمّلها لســــــان ثقال
القليَّب مسكين راه ذايب رفقي من حـــــالو★
و العقيّل مشى يـــا السمرة قاسو لهبال
قولي لي بالله يـــا السمرة ش ْتراك تسالو★
لا كبدة هزّت لا نظرتي من ذاك الحـال ؟
شفت جفاك عصى ما شفقتي ما شفتي مالو★
واش ذا كلّو جهل اولا موضة من لـَـدلال
راه الطير الحر يا غزالة ما يهز رحــــــــالو★
مــــــَا يترك عشّو ما يغرّو زيغ التجوال
كيف الدلو د البير يـا حبيبة يهجر طوالو ؟؟★
راه يبقى عطشان لو غــابت عنّـو لَحبال!!
مهما طال جفاك يا الگمرة حنا عليك نســـالو★
و الگلب المحروق راه باقي ينبض مـازال
هذا عار عليك يا السمرة سمعي لســــــؤالو★
لا تزيدي همو راه خــــــاف يكثرو لعلال
حضني هاذ عشيق يا حنينة و سكني ف ظلالو★
و اسقيه غرامك لا تخلي روضو يذبــــــال
كوني ليه طبيب يــــــا نجيمة جراحو يقلالو ★
و تطل الفرحة ضـــــاوية ك بسمة لَهلال
★★قسم 2★★
يلا تديري معروف يا الشهدة و تشوفي مالو★
كوني لو نحلة يا حبيبة جبحو يعســـــــال
تعالي طفى جَمْــرو يـا وريدة تبرد هوالو★
حتى ينسى لَهموم و ما يعود حامل ف ثقـال
هـــذا نِدا لك يا قميحة اسمعي مــــــوَّالو ★
انا زرعتو بدرة يلا سقيتيه ينوض سبـــال
ف ريـاضك يكبر ك سبولة و تكثر غلالو ★
و من ذيك البذرة را نحصدو درة و كبال
لا التيقي بمن قال راجل قيمتو في مــالو ★
و شحال من راجل بمالو و ما يسواش ريال
لَقحيح بين رجال يـا لبيبة قياسو ب افعالو ★
ذاك من قلبو كنز و عقلو هو راسمـال
ما يتبع قمار ما يراهن بالو ف عيــــــالو ★
و ما يصرف عن بيت إلا من جهدو لَحلال
راه الناس اجناس و اهل الجد اليوم قلالو★
يلا ردْتي تعزل راه خاصك لهم غربـــال
دَنْدَنْتْ كلامي دون ما نشوف قياس مثالو★
و غَرْبَلْت حروفي و عْزَلت الحبة من نخــّال
هذا قول غرام من (يزيد) صاغو بخيـــالو★
و من عجبو الكلام ، راه باقي منو مازال
★★قسم 3★★
يا زينة لريام يا السمرة يــا بدر ب كمالو ★
يا نجمة ف سما يا قمر يا غرة لهلال
كيف يدير غريم في ظـلام و لا ضي حوالو ★
لا شمعة باين نورها لا قنديل شعال
حاير و مضيوم يا السمرة و الهموم عضالو ★
خايف من لَبعاد يهلكني قبل الآجال
زيتك يا قنديل مـــــــا روى و لا مس فتالو ★
و الكمرة ف سماي عالية تبعدني بْميال
ما نحكي عالجرح راه طايب لا تسيل دمالو ★
قلبي حامل حب ما تقوى حملو لَجبال
لو في صدري باب يصِل قلبي نبادر بزوالو ★
ما نتركو عندي و لو لحظة هذا محال
قلبي كان سبع يا السمرة داير باشبالو ★
كان قوي و صحيح و بكل ثقة يجابه لفيال
و اليوم صار غشا كيف خنشة عاثر ف سمالو ★
إيلا تحط ف غاب بِوْقاحة تركلو لَبغال
هذا حال الحب يا سيادي و هاذي افعالو ★
و يا ويلو من حب محبوب و من دون آمال
غرام السمرة يقتل و اللي قاومها تغتالو ★
كلمة ( علوي) قالها نقلوهــــــا أجيال
★★قسم 4 ★★
ربي من يعلم آش حامل قلبي ف دخالو ★
ديما في بالي في نهاري و ليل و ما طال
سلب عقلي لسمر واش نعمل العيون حوالو ★
ما ننظر غيرو ما نخاطب حد ف جوّال
حبي حُب حبوب و بالحبة معزول مكالو ★
ماشي كيف الغير مطحون طحينو نخال
حبي حب ثقيل غير قلبي وحدو من شالو ★
ما يحملوه جبال بقمم و سلاسل طوال
لما جاني حراز على السمرة يجادل بقوالو ★
وانا على السمرة ســــاقي طابو بالترحال
قطعت شلا بلدان و القلب السمرة ف دخالو ★
ما سْها بين جبال ما نسى ف ثلوج او رمال
الحراز جا برباب كيدندن ، و نغمة ف قوالو ★
لابس قناع الخبث و مخبي فصورة زجال
يصدح بانشادو يـــــــا سيادي يومو بليالو ★
وانا على السمرة ما نفاصل بشدى ف سجال
قولو للحراز يشوف لو شيخ هو يقرالو ★
ما يبقى معمي ، يفهّمو يفتّحلو المقال = ( العيون)
حرازي تالف ما فاهم ( يزيد ) ش جرى لو ★
ما خاد العبرة من دروس ، ما كان على بال
★★ قسم 5★★
زين الزِّينة زين مــــا كاينشي زين بحالو ★
و من فاقد زينو راه يبكي لُو عــــــاللطلال
هذا غزل مغزول على غزالي بمغازل زالو ★
و كل من جادلني على غزالي يشدو زلزال
هيام الريم صعيب ما يفهمو الا من جالو ★
و الحراز غشيم بـــــاش يفهم لبغو محال
سمرتي انا ريم ما شافَت لَغْواب مثالو ★
سالف كيف حرير على كثاف نازل شلال
اللون اسمر فتان و من عشقو يتغير حالو ★
يصير سليب القلب و لِبها(ء)سمرا قلبو مال
خدودها كِ غنباج نشوفهم عضايا يجفالو ★
و لَهْدَب كيف ظلام بلا كحل تراه ُيكحال
من لا شاف شفاه ما عاش ولا شايف والو ★
خاتم من شهدة من ذاقو جاد ف الوصال
مبسمها مرسوم كيف ليل مقوّس هلالو ★
و البسمة زينة و حتى الريق لو طعم زلال
لها خصر نحيل حين يتهز يزيد دلالو ★
و صدر جوج تلال ما تركبو خصك شحال
عنقها عنقاء و النقا باين فيه جمالو ★
متسرسب عقيق لوبان مدرق الخال
★★ قسم 6 ★★
غزالي وسط الغاب ، و غيري ما يدخل دغالو ★
و ما يصطاد العنود سوى من قارص عــاللنبال
كثير نغير عليه و على المغيار اسمع شْ قالو : ★
( من صادف مغيـــــار لا يكثر معه جدال )
ما نقبل من يذكر سمرة و لو ف مقالو ★
راني عليها نغير حتى من ظل او الخيال
لو يريد الزين نبيع روحي ، أو نهديها لو ★
و نعطيها قلبي في خراص تحطو خلخال
ما يدخل لغرام غير فارس صنديد ف قتالو ★
وانا عاشق لقتال و نحارب من دون نبال
و ما نترك سمرة و لو كان عيونو يحوالو ★
هاذي زين( الريم شدون مها عزة و غزال )
غرام السمرة شلال واد جاري مالي جدوالو ★
يسقي حوض البور و تنوض دوالي و نخال
و من لا لو جدوَل من غدَا زهارو يذبالو ★
و ما ينبض صدرو من جيهه جنبو ذ شمال
قولو للحراز آش مالو ، علاش زاد هبالو ★
راه يزاحمي على السمرة ، و ما نحب هزال
جاني يجادلني على السمرة و زايد ف جدالو ★
يريد يباعدني على غزالي ، و هذا محال
★★قسم 7★★
ما باغي يفهم ذا غشيم و بالغ ف جهالو ★
ما رايد يروى و لا يشوف قوال العقال
يا مَن هو يصغى، لي قدر محزّم قفّــالو ★
و من لا لو قفّــال ما فقدرو ، تراهُ يبسال
الحراز الهاوي ما مساوي و رافع مشعالو ★
جاي جامع طاوي مع تلاوي بخطى يختال
من غيرتي نفضح كل كذبو ، نزيد ف تبطالو ★
و نخلّيه صريع وسط حلبة سيفو عطّال
انا عودي مقدام و الخيل ما تصمد ف نزالو ★
و عودو ما يقوى غير يشوف عودي يجفال
انا على السمرة ما نفاوض من نفهم والو ★
فصدري قلب يحب و ف يدي سيفي جلجال
من يقرب حبيبتي ، بسيفي نبتر وصالو ★
و نجيه في لَوجه حيت انا ماشي غفّال
يلا ضربتو ضربة نفارقو على ظلو و خيالو ★
و يحتار ف بدنو ، حين يلقاه رطال رطال.
من ضربة نرديه يروح هارب عاثر ف سمالو ★
السمرة ما تقبل من بان ف قولو محتال
ما نترك نداد و من جــــا ند نسارع بزوالو ★
سوق السمرة برج ، ما يبرّح فيه الدلاّل
★★قسم 8 ★★
ما تنفعو حيلة مع السمرة و ما تفيد حيالو ★
و تعود السمرة معنقاني عناق الابطال
عناقي للسمرة ما يفهمو ما يعي بفضالو ★
و من وصلو لحني وريد قلبو يبقى شغّال
صدرها على صدري و قلبها نابض بين تلالو ★
و كل دقة من قلبها في صدري نسمعو مرسال
قلبي سمع لغاه و صار ينبض على منوالو ★
دقة على دقة صارت نغمة ، خرجت موّال
للسمرة نهدي قصر دهبي بابو ب قفالو ★
ما يوصلو حرّاز حيت عاصي فالبرج العال
نهديها قمصان و كل قميص معاهُ صندالو ★
و ما ننسى قفطان من فاس بجنبو تخمال
كل هدية ف طبق و كل طبق معاهُ طبّالو ★
و سابق بالوترة و بندير قشبال و زروال
و نعرض المغرب ببحورو صحرا و جبالو ★
و تبارك الحضور ل( علوي) من تافيلال
و نختم كلامي و حرازي نشفق من حــالو ★
لما يشوف حبيبتي السمرة لها تمثال
ماتفيد حيالو و لا قوالو و لا مرسالو ★
ف قْبال غرامي غرامو مـــا ساوي مثقال
★★تمت بحمد الله ★★
★★ في 5 ماي 2020★★
★★ يزيد العلوي الإسماعيلي ★★
تعليقات
إرسال تعليق