♕♕♕ فرقة لَفْساد ♕♕♕
بإسم العالي بْديت قولي مولانا خالق العباد
و النَّبي سيد لسياد
رسول الله سيدنا محمد من جانا هْدى
نحكي دايَا مع مْصابي بسِرّ، لورقة مع المداد
همّ ف جوفي بلا عداد
و من كان سباب في مصابي : ذاك الفرقة الفاسدة
زرعو دمعات في جنان الضحكات و ما بقى اعياد
و الْوَبا تابعو كْساد
لَسْواق ضحات في زيادة و بِالْكاد الناس صامدة
ياما من قوم من آل المنكر للفرقة انقاد
و بقى لكثير ف الحياد
و اردال القوم ما احتَجّو وَلا طاقو معاندة
♡♡♡♡♡
مـا دارو خير للبلاد * ذاك الفرقة الراگدة
زرعو بدرة بلا سماد * و نصلو نتلة مقادة
ما قالو «لا» للفساد * ما قالو: لاش هكذا
الحداگة غير فالحداد* و دموع بلا فايدة
♡♡♡♡♡
عام العشرين فوق قرن العشرين بداية الكساد
في مَا و هْوَا مع الزّاد
الناس تخاف من الازمة و هي لنا مطاردة
قالو: لَهْموم و لَمْواجع و اعمال الفوضى تزاد
و العامل ما لْقى الزاد
عايش الْهَمّ مع الفاقة، و سوم الاسعار صاعدة
داعت لَحروب و القتايل و طاح القتلى بلا عداد
كلها قابط عَالزّناد
داعت لَفْتان ف الحواضر و نار البارود زاندة
كثرات سيول مْعَ حرايق و حروب وما بقى حصاد
و طَلُّو لحجار من الواد
و فرقة لفساد كانزة ف مال الامة و لَابْدة
♡♡♡♡♡
بُوصَابَر راكب جّياد * بن شَنَّة فيه شادّة
الهَيْطل لَلْأسُود قاد * تُعالَة لُو مساندة
وَلْوَل جانا بْلا معاد * كذاك النُّهام صادّة
بن داية خالف السداد*و الدرمة عيب جابدة
♡♡♡♡♡
كلامي مَهْماز فيه لَلْغاز لآل الرّشد الشداد
من صال الحل او كاد
فرقة لفساد في بْلَادَة و ف لَمّ المال شاردة
لَحجر و شْجر بِمْكر الغدارة صارو رماد
و البيت بقى بلا وْتاد
ما بقى في أرضنا سلام و صارت الكذوب قاعدة
رماوْ التهمة على حرار الامة من كانو نْداد
سلاسل و قيود و الصفاد
حطوها فِ يدْ كل باسل ... ذاك الفرقة الحاقدة
ياما من ذِيب راح غاب يصيّد لكنُّو تْصاد
ف ظلام الليل حين ساد
فرقة الفساد ف النهاية و حنا تاريخنا بدا
♡♡♡♡♡
ما تْبِيع مْداد ف المزاد * والا الْكَلمة بمادّة
مَن تْبَاع رخيص آش خاد * غِير الخِيبة الآكْدة
سلُّو لَقْلام من غْماد * و خلُّو الَحروف حادّة
صَنْعو بْزْواقها عتاد * تطلع كلمات گادَّة
♡♡♡♡♡
بعض الجُردان من شرق المغرب بْداوْ بالنّكاد
ف بلاد شْيوخها وْغاد
لبسو بِيرِي مع تْرِيِّي و شي مَشَّايَة مْفاردة
و القايَد باح بالضّْغينة و جَمهورُو فاقد الرّْشاد
بالسّب تْمادى و زاد
و بانت لَعيوب فيه لُولَا و التربية الفاسدة
ما صبْنا مع الجار حيلة لا نخْوَة فيه لا وْداد
قلبو مَالِيه بالحقاد
لَوْ تشقُّو عليه قلبُو تلقَاوْ شْرور راگدة
سابق لَلْعيب دون طِيلَة فاضح ما فيه من عقاد
بلسان قبيح كالرّعاد
لا حيلة معاه لا وْسيلة مع ذْالنّخبة الشادّة
♡♡♡♡♡
ما زاد الْهَمّ غِ تْزاد * لاش النّخب جامْدة
ذُوك العسكر غِ جْراد * للشّرعيات فاقْدة
رَكْبُو عبلة بلا سْناد * تركو لَبْلاد راكْدة
لا لْهُم صِيلة و لا مْجَاد * لا تَوَارِيخ خالْدة
♡♡♡♡♡
زرعُو لَغْراب في بلادي بْحال البدرة بلا سْماد
نبْتُو دودة مع گْراد
صارو بينَ لْقوام ضحكة و جميع وْطان شاهدة
كُنّا عِيلَة قْبال عِيلة و في ليلة صِرنا بْعاد
فارقو كبدة على كْباد
حيَال العسكر ما قْليلة و داروها غِ مْضَادّة
♡♡♡♡♡
ما دَارُو بْوْصاية كيف قال لَجْداد ***
ما فتحو الحدود لوالدة و والد
ما صغاو لْعُلامة ما رضاو زُهّاد ***
لا لْدَم الشّهيد ولا اللي مْجاهد
ما رامُو قبلة والا حناوْ سجَّاد ***
لا راحو بالشعب لشي فْجَر خالد
كيف نرجى من خاين عَالْجُور معتاد ***
يكون صايگ لَرجَى وِالَى نْجاح قايد
كيف يفلح من هُو فالح غِ ف لُقْعاد ***
كيف يبني أمّة من هُو لْباب واصد
كيف يسلك الكَرغُولي طريق لَمْجاد ***
ذاك من هُو سَروالو بالبُول سارَد
♕♕♕♕♕♕♕
بوصابر = بن شنة = الحمار
الدرمة = الذيب
تُعالة = انثى التعلب
هيطل = التعلب
ام قشعر = نسر
الوَلْوَل = النُّهام = البوم
ابن داية =الغراب
بقلم: يزيد العلوي الاسماعيلي
تعليقات
إرسال تعليق