اللاَّهِي
النِّسْيَان نْسَــــــانِي و هْذَب مَا طْبَق ★
و أْجَـــــــاجْ الدَّمْعة مَـا جَفّ من رْمَاقِي
جْفَا النُّومْ جْفَــانِي وْ مَا حَنّ مَا شْفَق ★
وْ مَا لْقِيتْ مَا يَطْفِي عَبْرَات فِي عْمَاقِي
كُل فْرَاقْ صْعِيبْ و دْالمِّيمَة عْمَق ★
مَــــــا يْدَاوِيه طْبِيبْ وْلَا فْقِيه رَاقِي
يَــــــــــا الرَّبّ العَالِي مِن حَالِي رْفَق ★
شْفِينِي من دَايَا و طْلَق لِي وْثَــــــــاقِي
جُدْ بالجُودْ و برْضَا عْلِينَـــا غْدَق ★
و امْنحْنِي إيمَـــــــان تَبْرَد لِي اشْوَاقِي
★♕★♕★♕★
يَـــــــا اللَّاهِي بالدُّنيا رَا المُوت حَقّ ★
وْ مَن رَاح لْقَبْرو اَشْنُو تْرَاه لاَقِــــي
وْعَ وْ خُدْ الْعِبْرة مِن ذَاك مَن سْبَق★
بَعْد ما عَاش حْيَاتو عْلَى الدّْوَام شَاقي
مـَـا يْتِيق فْ الدُّنْيــا الاَّ اللِّي حْمَق ★
وْ مَـــــا يْفُوز الَّا مَن فِيها يْعِيش تَاقي
مَن لْهَى و تْلَاهَى فْ الدُّنْيَــا غْرَق ★
مـَــــا يْنَجُدُو مَالُو وَالَا عْلِيه وَاقِي
كَان عَاضّ فْ الدُّنْيا بْسْنَـــان مَا طْلَق★
وْ حِين رَاح كُل مَا جْنَاه وْرَاه رَاه بَاقي
سُبْحـَـــــان الخالق هُو الِّلي خْلَق★
القُدُّوس القَيُّوم الدَّايَم البـَــــــــاقِي
بقلم 🖊 يزيد العلوي الاسماعيلي
تعليقات
إرسال تعليق