يـــا القلب المكلوم الشاكي من الدَّا ••
ايَّاك تشكي للغير و تصير فيك عادة ••
لجَّم لســــــانك بلجام باش يهدا ••
و حسب الكلمة مزيان فين غـادة ♕
يــا القلب المضيوم الباكي من عدا ••
لا تبيَّن دمعك لعدو يلا تمـــــادى ••
را بكــاك يخلي العدو يزيد شدة ••
و تعود الدمعة وصمة بلا يفــادة ♕
قاوم و عد العدة •••
حاول و حل العقدة •••
را الفرج بعد الشدة •••
مهما طــــال المدى ♕
يا اللسان المطلوق شكى ، فكل نكدة ••
را ودان الســـامع تدوي بلا ارادة ••
و لو حـالك حــالك و ما يسر العدا ••
لا تزيد سوادو و يكحال بالزيـادة ♕
را اللسان هو سر نْجا يلا تَّحظى ••
كذاك هو سر البلوة يلا تمـــادى ••
را سكـــاتك دهب يلا الكلام فضة ••
قول قــالوه قدام و هاذي شهادة ♕
را اللسان مضا من لمضا •••
يمارتو واعرة من عضة •••
ياما على من قوم قضى •••
و ياما طيَّح قادة ♕
يـــا الحرف المحروق الداوي بحدة ••
لا تعــاند قوافي لا تجي بْــــأَدى ••
قالو كلام اليوم شهــــــــادة لغَدَّا ••
و ياما من كلام بْطَل شِي عبـادة ♕
ياما من كتاب مع الزمــــان صدَّى ••
لــكـن كـلامـو مــازال فـي ولادة ••
مهما طال الوقت ف كل حين ينْدا ••
و آثار كلامو مــــازال ما تقــادى ♕
يجي من جد و جدة •••
مهما طـــــــول المدة •••
شلَّا جيـــــل تحدّى •••
و عاد بالـسيادة ♕
يا الســـــــايق بين سطري غِ تْهَدّا ••
لاش جـــاري و سير بالمهل لا تّْـآدى ••
را كلامي حـــــامل من المْعان عدّة ••
غِ تدبر و سير مهيل ف القيـــــــادة ♕
لو تصغى لقيـــاسو تصيب فيه لذة ••
و لو تسمع انفـــاسو تصيغها نشادة ••
حلاوتو في جُوفُو كما عسل شهدة ••
و فيه دْوا من دَا ما طـــالْتو عيادة ♕
و يْلا ما لقيتِ جودة •••
جِ عطيني ألف جلدة•••
و رمي هدا ف الخردة•••
و سِر من دُونَ يْشَادَة ♕
يزيدالعلوي الاسماعيلي
تعليقات
إرسال تعليق