كِيفْ يَصبَر من هُو قاعد عَالجّْمَر؟
الگادْيَة فيه النار و حالتُو شْرارة
كيف يصبر من همُّو قاسْم الظّْهَر؟
دْمُوعو على خَدُّو و حياتُو مْرارَة
ما سْمَع حَدّ غْواتو *
ما صغى حدّ صواتو
راه كاتم كِيَّاتو
يْعَانِي المُرّْ
كيف يلقى منجا من فاقد الزهر؟
لا ربح في بيعة والا درى شطارة
كيف ينجا من غارق وسط البحر؟
لا سفن جوارو و الا لقى بحارة
ما لحق باللي فاتو *
حد ما طاق نجاتو
ولا قرا حد براتو
و مات بالقهر
كيف يصبر من قلبو ضاق من الصبر؟
و يتسنى الفجر يجيه بالبشارة
كيف يطلع من هو طايح فالقْعَر؟
و ما يرى من امل شعا و لا يمارة
وسط ظلمة قهراتو *
قلب عتمة ظماتو
و حلمة ما نسّاتو
و فيه كتْجَر
كيف يصبر من قلبو ب همو عمر؟
من رفقة صحاب نهات بالخسارة
كيف يندم من كان بشبابو تغر؟
و ما فكر للشيب لما يجي غرارة
ما اسفاد ممن فاتو *
ولا من سبقو و ماتو
لاهي ف حياتو
من المهد للقبر
كيف ينظر من هوَ فاقد النظر؟
ما افهم بالمعنى و لا يْعِي يْشارة
شكون اسمع للزجال لما جا شْعر؟
ذاك حسبو غنْوَة و زهى بالقصارة
ما سرح بين بياتو *
و آش الحروف حكاتو
لاح كلش ف قفاتو
و لا بشِي شعر
لاهي ف التيك توك و ذوقو خسر
يتابع آل الفسق و أهل الدصارة
ما صانو لعراض ما غطو خصر
و كلام سفاهة نطقوه بالشهارة
ما خافو سيئاتو
ما هابو علاتو
زادو من زلاتو
و كلشي خضر
ما يسترو عورة ما يخفو ف سر
و الرجال ف القنا تلفانة حيارة
ذيك تغري بنهود و ذيك بالذبر
دخلو بالحشمة و قلبوها دعارة
شي لموال عماتو
شي الشهرة سطاتو
آش يقضي بحياتو
يلا فنى لعمر
و الروتين اليومي حال ما يسر
لهز ف البوط ولرداف قالو : مهارة
و زوج المرا يتباهى بوجهو احمر
آشمن جد بوها هاذي من حضارة
ذاك مرتو شهراتو
و ذاك بالمال غواتو
و ذاك ذيوت خواتو
لا لو وقر
الحشومة حشمت و الحيا غْبر
حين ذات الطارة مَدُّو لها الشارة
سمحولي يلا كنت خرُجْت عالسطر
راه زيغ العربية فايت النصارى
لا شعرها غطاتو
لا لحمها ستراتو
و المخبي فضحاتو
و كلشي ظهر
يا عجابة ف عجوز تربي ظفر
معاندة مع طفلة ما تدري طهارة
و الرجل تالف لخلاقو طمر
غير فاتح فمو و يلوح ف الشكارة
غي بغمزة سلباتو
غي بضحكة سحراتو
نسى ولادو و بناتو
بعد ما سكر
بدات العجوز ف عينو كانها قمر
و من عشقو القمر يباتو سهارى
و الشايب دايخ زربة بلا خمر
و الشينة ظهرت ف عيونو نوارة
على ولادو خطفاتو
و على الدار جلاتو
ما بقى يطيق مراتو
و منها نفر
ضاع بين الدرعين و جيد و النحر
لحين خوا جيبو و ضحى بلا عمارة
ضاع وسط الطوفان و ما لقى البر
و من دخل سوق نسا يخسر ف التجارة
و للعالي نختم بالحمد و الشكر
و السلام على من جانا بالبشارة
سيدنا محمد من حــــامل الذكر
طالبين المولى نمشيو لو زيـارة
يزيد العلوي الاسماعيلي
آه يا سامعني شعري مشى خسارة
و ذاك حامي لشعار ف يومنا غبر
هذا زمان التيك و فيس و التصارة
و ما فلح الا من عرا على الخصر
حطوها ف الطوب و عطوها الشارة
و ذاك ينظر لنهود و ذاك للذبر
قناة التيك توك قلبوها دعارة
و السر اتفضح و ما عاد سر
اللي تخلى رجل ياكل من الكر
بقلم: يزيد العلوي الاسماعيلي
العجوز تبان بالخمر
الواحل بين امواج و لا لو زهر
ص دوماج ما عندي كوراج
، خ
تعليقات
إرسال تعليق