واه أيا زهري لعبات بك ليام
وصار شهد شبابك كانو منامة
طاح قدرك ف الارض تدوس فيه لقدام
ما بقى ليه الشان و صار غ قمامة
يا زهري طاح قدرك و لا حد يعدرك
لا حس بك و طل على النار الكادي ف صدرك
بكي يا زهري
بكي يا زهري على الزمان لي غدرك
و غوى بك و غرك
و ف غفلة منك لوسط الحافة جرك
شكي يا زهري
شكي يا زهري من الظل لي ضرك
و زاد ف حرك
و ركب عَوْد من العُود و عليك يحرك
واه أيا عمري و مشات بك لعوام
و كل سنة راحت تخلي علامة
حتى نجومك ف سما ضاعت بين لغيام
و بقيتي يا عمري ضايع في دوامة
عمري ف الدوامة ضاع
و من ضاع ف الدوامة لا لو مخرج
محال واش نورو باقي يسطاع
و زهري بعكازو ماشي يعرج
زهري بعكازو غارق ف القاع
و من غاص ف القاع اسمو ما يدرج
و عمري بلا مزاد تراه يتباع
سنة مور سنة نشوفو يخمج
و خا خمج، ف زهري راني طماع
حيث يلا فاق زهري نلقى مخرج
و الزهر يا اهلي شلا فيه انواع
و يلا انا بزهري نلقى منهج
مصابك يا زهري تضوي وسط ظلام
و تجيني من المولى مرسولة كرامة
و يعود زهري عالي ف سما كيف لعلام
و يروح عمري سالك سبيلو سلامة
لكن، فين هو زهري؟؟؟
فين هو زهري لي مشى و ما شاف النوار؟
فين هو زهري لي غبر و هجر الدوار؟
خلا غ الغيار،
و شلا فوضى و دمار
خلاني ضايع وسط كلمة تنين بالعبار
كلمة تخرج بعبار
و كلمة تخرج بجمار
و كلمة تخرج من القلب حامية
لكني صبار
واش قدات الكلمة؟؟؟
واش قدات الكلمة مع صايع من دار لدار؟
تالف عايش يعد ف السوايع جاهل شو صار
واش قدات الكلمة بحرف حافي ما له ظفار؟
زايد غ ف الهم و الغم و نكسة و مرار
شاف الكلمة لي قالها البارح تطلب ف الغيث
و كذا القلم الناظم في بياتو راه قال عييت
ش قضى من هو ناظم ف البيات و ما لاقي بيت؟
ش قضى من هو سامح في حياتو و تابع ف الهيت؟
ما بقيت رفيقو و لا نطيقو راني مليت
لكن بعد البعد ما سخيت و هاني وليت
سماحة يا قلبي من فيض هاذ الكلام
و ما حفرت ف ورقة وما نقش لقلام
و سماحة يا جفني يا لي سهر ما نام
حتى كمل الموال و تمم له لختام
يزيد العلوي الاسماعيلي
تعليقات
إرسال تعليق