قصيدة ♕ الگوال ♕ بقلم يزيد العلوي الاسماعيلي

دْوِيت حين ساءت لَحوال،  زاد الكذوب كثرت لَحيال ، و لَّي على الرّجلة عوّال ، ما لْقى مْسانْدة

هذا زْمان زاغو لَنْدال،  صار الرخيص ينشر ف ضْلال،  لَخْيول مغْشية ف ظْلال، و بْغال قايْدة

قَبْلو الوهم ركْبو لَخْيال،  و عطاوْ للمخ النّخــال،  تابعين طبل و طبّال، بعقول شارْدَة 

هذا زْمان قاسو لَهْبال، ضاع العبَار ضاع المكيال، ميزاننا مات بالجْحال(1)،  و مُوس حادة

عيى من الگُول الگوَّال، و عيى من صْياح و موّال،  و الگول ما بدَّل ف حٔوال  ، نْفوس

 فاسدة

حَرْفُو دبال ذاك الگُوَّال، جهدو قْلال و الحَمل ثْقال، و حَوض الرّبى راه ذْبال  ، و خريفُو بْدا 

حَرْفُو بْسال ذاك الگُوَّال، قــالو سْخيف قــالو معلال ، مهما طاف به الدَّلّال ، ما جاب ما  الدَّا

دلاَّل جـــا يْدير لِه الفال ، مرادو يصلَّح لَحوال ، لكنّو عصى و استحال  ، يَرقِيه من   الدَّا

الَجْواب ما صغى للسؤال ، وما اسْفاذ مَن راه يْسال ، اللسون سالكة فج هْبال ، بكذبة مْگادّة

من لو حمار قالو خيَّال، صنعو له شان و تمثال، و ذو الشان صابو لَهْمال، و نْعوت شادّة

حطو فْفَم لَفْضال سْحَال(2)، و لَجْمو قْلَم طامع ف نْضال، فسحو السّاح لِجاهل ضال من بعد ما بْدا

الكلام لو يتبـاع بْمـــال ،  لَمَا  كان كثرو  لَقْوال ،  و صـــار همّْنا قيل و قال ، بدون فايدة

همّْنا كْبير و الكلام طْوال، و ذِي رسالة  للْعقال ، بْصوت كل نسا و رجال ، لقلوم راگدة

قُلناها بالصّوت العال،  بْعيد عَالْعِيب و الَجْدال، و نْقُول قَول لْذاك العَرْقال،  لَعْبَك ما جْدى

ب🖊 يزيد العلوي الاسماعيلي