المدونة
يا الراجل آجي جنبي گلس و اسمع و غني
و افتح المدونة ... و ذوق البنود و حلِّي
ما بقِيت نبارك لعريس و لا نحيي و نهنِّي
ما بقاش على راسو تاج و صار لو ذيل مدلي
العروسة ركبت السرج ...عريسنا عاد محنِّي
و بعد شهر العسل هو يشوف ... و هي تَمْلي
ما بقى راجل في دارو عايش مرتاح مهنِّي
ذاك داخل ناقم ... و ذا راحل خارج مَجْلي
بعد ما كدّ نهار و ليل سنين من عمرو يفْني
جــــــــــات له المدونة تْرِيب ما كان يعلِّي
شكون باقي يشري لو بيت اولا باقي يبني؟
بعد ما جات بنود جداد تهد الساس و تخْلي
يلا خطات الرجلة من بيت بيتنا صار مدنِّي
و اللي راجل ما يرضى تْراه يمشي و يخلِّي
ولد يشوف مُّو غُولة و البُو ظهرو مَحنِي
آشمن قيمة بقات لبوه وباش باقي غ يَدْلي
كيف راجل يزرع بدرة و شَاكّْ انو ما يجني
و كيف يبني اسرة و يلا خرح محال يولّي
يا سانن لحكام اشراك من لجيال مسَنِّي
سوى شر ف شارع و قضايا بالمحاكم تَغْلي
يا فاهم لفهام فهّمنا شْ بفهامك تعني !!!؟
واش راك شارب شي ولا غ بالفضايح مَبْلي
ما بقِيت نبارك لعريس و لا نحيي و نهنِّي
ما بقاش على راسو تاج و صار لو ذيل مدلي
بقلم 🖍 يزيد العلوي الاسماعيلي
تعليقات
إرسال تعليق