كفاه «قصيدة زجلية بقلم الزجال يزيد العلوي الاسماعيلي

  

على ذ السؤال جَاوْبُو .....

لله يا سـامعين قولي على ذ السؤال جــاوبو

كيفاه صنديد  ف القتال يصير الحب غالبو

عندي صولات ف البسالة و تاريخ مجيد كاتبو

لكن القلب اللي نملكو محبوبي صار سالبو

من جاني حامل السلاح بحيالي نكون غاصبو

لكن الزين لي شواني ما قدرت على مصايبو

غلبت الثعلب ف الحيال و قرد الغابة اللاعبو

لكن غزالي سحرني و دوخني   بقوالبو

 لو  جاني خصم بالقداح  بلساني نصير عاطبو 

لكن غزالي هزمني و  ما قويت انا نعايبو

ما خفت وحوش ف الظلام و فيل يلا جا نحاربو

لكن الزين راه ماكر و طلعت انا الكانبو

لله يا سـامعين قولي على ذ السؤال جــاوبو

كيفاه صنديد  ف القتال يصير الحب غالبو

من  جــا بالعيب او زل  بكلمة  راني نعاتبو

لكن الزين راه ظالم وما قويت انا نحاسبو

حتى الطيور فالعشاش  بالعشوية تحابو

وشريكي جايب الشراك و ف عشي راه ناصبو

 الكتاب زرعتو غرام و القصيد الكل طالبو

لكن الزين ما هواه كلامي والا عاجبو 

 الزمان صعيب  لكن بصبري  راني غالبو

لكن غزالي غلبني ومعاه  الويل شاربو

عطيتو ما لي و ما كفاه و اليوم تزادو مطالبو

حاضي غدوي مع رواحي و حتى حلمي مراقبو

لله يا سـامعين قولي على ذ السؤال جــاوبو

كيفاه صنديد  ف القتال يصير الحب غالبو

يا ما عديت من محان و الصبر انا مجربو

لكن الزين لي كواني كتف صبري و هربو

قلبي معمي  فين ما لقى شي هم يعود جالبو

و عقلي لي كان باقي هاهو  قلبي صار خاربو

ذا قاسي ما حن فيا و زاد عليا متاعبو 

ما حدِّي به كنراري و هو حاشي مخالبو

وصية ناس زمان قالو من جا نابح لا تجاوبو

اما ذا من دسّر قانع  راه يلحس لو شواربو

عـالجت كثير من خبال و المعطول انا نصاوبو

لكن العطب لي ف قلبي ما قدرت انا نقربو

آش الداني لْها الزين ولا هو آش جايبو

لا هو مناسب ليا والا يانا مناسبو

قالو ناس زمان يلا تراري بالزين تكون كاسبو

لكن هاذ الزين ما جدى فيه مديح و لا مناسبو

لله يا سـامعين قولي على ذ السؤال جــاوبو

كيفاه صنديد  ف القتال يصير الحب غالبو

                         ؟؟؟؟؟

       

بقلم يزيد العلوي الاسماعيلي